ન્યૂ યોર્ક : ન્યૂ યોર્ક સિટીના મેયર ઝોહરાન મમદાની દ્વારા રજૂ કરવામાં આવેલા 'મિલિયોનેર હોમ ટેક્સ' (Pied-à-Terre Tax) ના પ્રસ્તાવથી માત્ર બીજા ઘરના માલિકો પર જ ટેક્સનો બોજ નથી વધ્યો, પરંતુ તેના કારણે ટેક્સ ચોરી અને વાહન નોંધણી કૌભાંડનો એક ગંભીર મુદ્દો સપાટી પર આવ્યો છે. મિલકત માલિકોએ પોતાની પ્રાથમિક રહેઠાણ વિગતો સાબિત કરવાની પ્રક્રિયા દરમિયાન "ગેરેજ ફ્રોડ" અને "ઘોસ્ટ કાર" (Ghost Cars) ના મોડેસ ઓપરેન્ડીનો ખુલાસો થયો છે, જેમાં ન્યૂ યોર્કમાં રહેતા અને વાહન ચલાવતા લોકો ટેક્સ અને વીમા પ્રીમિયમ બચાવવા માટે અન્ય રાજ્યોમાં પોતાના વાહનોની ગેરકાયદે નોંધણી કરાવે છે.

તપાસકર્તાઓના અહેવાલમાં મોટો ધડાકો

વર્ષ ૨૦૨૫ માં ન્યૂ યોર્ક સિટી કાઉન્સિલના ઇન્વેસ્ટિગેશન ડિવિઝન દ્વારા કરવામાં આવેલા સર્વેમાં જાણવા મળ્યું હતું કે અન્ય રાજ્યોની પ્લેટ ધરાવતા દર પાંચમાંથી એક વાહનમાં લાઇસન્સ પ્લેટ મેળ ખાતી નહોતી અથવા તેની નોંધણી બોગસ હતી. આવી "ઘોસ્ટ કાર" ચલાવનારા વાહનચાલકો સ્કૂલ-ઝોનમાં સ્પીડિંગ અને રેડ લાઇટ જમ્પ કરવા જેવા ગંભીર ટ્રાફિક નિયમોના ભંગમાં આગળ હોય છે અને દંડ પણ ભરતા નથી. તપાસમાં એ પણ સામે આવ્યું છે કે પ્રતિકૃતિ પ્લેટો અને બનાવટી રજિસ્ટ્રેશન આપતી ગેરકાયદે ઓનલાઇન સેવાઓ ધમધમી રહી છે.

ઇટાલી અને ફ્રાન્સ જેવા દેશોમાં પણ સમાન કૌભાંડ

વાહનોની આવી છેતરપિંડી માત્ર અમેરિકા પૂરતી મર્યાદિત નથી. ઇટાલીના નેપલ્સમાં લોકો વીમાનો ખર્ચ ઘટાડવા સ્થાનિક વાહનોની નોંધણી રદ કરાવી પોલેન્ડમાં ભાડા કરાર બતાવી પોલિશ પ્લેટ પર કાર ચલાવે છે. તેવી જ રીતે ફ્રાન્સમાં રાષ્ટ્રીય ઓડિટર 'કોર ડેસ કોમ્પ્ટેસ' મુજબ બોગસ "ઘોસ્ટ ડીલરશીપ" ના માધ્યમથી લગભગ ૧૦ લાખ ગેરકાયદે વાહનો રસ્તા પર દોડી રહ્યા છે, જે કર ચોરી અને સંગઠિત ગુનાખોરી સાથે જોડાયેલા છે. હવે ન્યૂ યોર્કથી લઈને યુરોપ સુધી આવી ટેક્સ અને વાહન છેતરપિંડી સામે ઝુંબેશ તેજ કરવામાં આવી રહી છે.