લોસ એન્જલસ: તા.12 હોલીવુડની જાણીતી અને લોકપ્રિય યુવા અભિનેત્રી જેના ઓર્ટેગા (Jenna Ortega) હાલમાં કોઈ નવી ફિલ્મ કે રેડ-કાર્પેટ લુકને કારણે નહીં, પરંતુ પોતાના બદલાયેલા શારીરિક દેખાવને કારણે સોશિયલ મીડિયા પર જોરદાર ચર્ચાનો વિષય બની છે. તાજેતરમાં એસ્ક્વાયરની "હાઉ આઈ ગોટ હીયર" ટોક શો શ્રેણીમાં હાજરી આપ્યા બાદ દર્શકો અને ફેન્સ તેના લુકને જોઈને આશ્ચર્યચકિત થઈ ગયા છે. ઇન્ટરવ્યુમાં ઓર્ટેગાએ બાળ કલાકારથી લઈને હોલીવુડ સ્ટાર બનવા સુધીની પોતાની સફર વિશે વાત કરી હતી, પરંતુ નેટીઝન્સનું ધ્યાન તેની વાતચીત કરતાં તેના અત્યંત પાતળા દેખાવ પર વધુ ગયું હતું.

ઇન્ટરવ્યુ વાયરલ થતાં જ સોશિયલ મીડિયા પર ચાહકોના બે જૂથો સામસામે આવી ગયા છે. એક વર્ગે દાવો કર્યો છે કે ઓર્ટેગા અગાઉ કરતાં નોંધપાત્ર રીતે ખૂબ જ પાતળી અને નબળી દેખાઈ રહી છે, જેના કારણે તેના સ્વાસ્થ્ય વિશે ચિંતાઓ સેવાઈ રહી છે. એક યુઝરે લખ્યું, "તે આટલી બધી પાતળી થઈ ગઈ છે, તેના સ્વાસ્થ્ય વિશે કોઈને ચિંતા કેમ નથી થતી?" તો બીજી તરફ, કેટલાક યુઝર્સે ભારપૂર્વક કહ્યું હતું કે સેલિબ્રિટીઝના શરીર અને અંગત જીવન પર આ પ્રકારે સતત નજર રાખવી અને ટિપ્પણીઓ કરવી તે યોગ્ય સંસ્કૃતિ નથી.

આ ચર્ચા માત્ર જેના ઓર્ટેગા પૂરતી સીમિત ન રહેતાં સમગ્ર હોલીવુડમાં વધી રહેલા અત્યંત ‘પાતળાપણા’ (Zero Size/Extreme Thinness) ના ક્રેઝ તરફ વળી ગઈ છે. લોકો આ પરિસ્થિતિની સરખામણી તાજેતરમાં ગાયિકા અને અભિનેત્રી એરિયાના ગ્રાન્ડે (Ariana Grande) તથા કાન્સ ફિલ્મ ફેસ્ટિવલમાં ડેમી મૂરના દેખાવ સાથે કરી રહ્યા છે. લોકો સવાલ ઉઠાવી રહ્યા છે કે શું હોલીવુડ ફરી એકવાર અવાસ્તવિક અને અસ્વસ્થ શારીરિક ધોરણોને પ્રોત્સાહન આપી રહ્યું છે?

સોશિયલ મીડિયા પર ચાલી રહેલા આ તમામ વિવાદો અને ચર્ચાઓ વચ્ચે જેના ઓર્ટેગા અથવા તેની ટીમે હજી સુધી કોઈ પણ પ્રકારની સત્તાવાર પ્રતિક્રિયા આપી નથી. તેમજ તેના સ્વાસ્થ્યને લઈને કોઈ ગંભીર સમસ્યા હોવાની પુષ્ટિ પણ તેના પ્રતિનિધિઓ દ્વારા કરવામાં આવી નથી.