નવી દિલ્હી: તા.12 દેશભરમાં યોજાતા વિવિધ વિરોધ પ્રદર્શનો અને આંદોલનો દરમિયાન સામાન્ય નાગરિકોની અવરજવર તેમજ આવશ્યક સેવાઓ ખોરવાઈ જવાની ગંભીર બાબતને સર્વોચ્ચ અદાલતે ધ્યાને લીધી છે. બુધવારે ભારતના મુખ્ય ન્યાયાધીશ સૂર્યકાંત, ન્યાયાધીશ જોયમલ્યા બાગચી અને ન્યાયાધીશ વી. મોહનાની ખંડપીઠે આવી પરિસ્થિતિઓમાં નાગરિકોના મૂળભૂત અધિકારોનું રક્ષણ કરવા અંગેની એક મહત્વપૂર્ણ અરજી પર સુનાવણી કરવા સંમતિ દર્શાવી છે. અરજદારે કોર્ટનું ધ્યાન દોર્યું હતું કે મોટા પ્રદર્શનો વખતે સામાન્ય પ્રજા અને હોસ્પિટલ જેવી ઇમરજન્સી સેવાઓની એન્ટ્રી-એક્ઝિટ તીવ્રપણે પ્રભાવિત થાય છે.

સુનાવણી દરમિયાન અરજદારના વકીલે રજૂઆત કરી હતી કે જ્યારે જાહેર અને રહવાસી વિસ્તારોમાં હિંસક કે મોટા પ્રદર્શનો થાય છે, ત્યારે સામાન્ય પ્રજા અને પ્રદર્શનકારીઓને અલગ ઓળખવા મુશ્કેલ બની જાય છે. આ કારણે સામાન્ય મુસાફરો અને સ્થાનિક લોકોને ભારે હાલાકી ભોગવવી પડે છે. ખંડપીઠે આ ચિંતાઓને વાજબી ગણાવી હતી પરંતુ સાથે એવો પ્રશ્ન પણ ઉપસ્થિત કર્યો હતો કે આવી વ્યાપક પરિસ્થિતિઓમાં સમગ્ર દેશ માટે યોગ્ય માર્ગદર્શિકા (Guidelines) કેવી રીતે ઘડી શકાય.

સુપ્રીમ કોર્ટે આ નવી અરજીને દિલ્હીના જંતર-મંતર ખાતે થતા વિરોધ પ્રદર્શનો અંગે અગાઉથી પેન્ડિંગ રહેલી અન્ય એક જાહેર હિતની અરજી (PIL) સાથે ટેગ કરી દીધી છે. અગાઉની અરજીમાં દલીલ કરવામાં આવી છે કે જંતર-મંતર જેવા સાંકડા સ્થળે આંદોલનો કરવાથી સ્થાનિક રહેવાસીઓને અસુવિધા થાય છે અને તબીબી તેમજ આવશ્યક સામગ્રીના પરિવહનમાં અવરોધ ઊભો થાય છે. તે અરજીમાં વિરોધ પ્રદર્શન માટે રામલીલા મેદાન જેવા કોઈ મોટા અને વૈકલ્પિક સ્થળનો ઉપયોગ કરવાનો પ્રસ્તાવ મૂકવામાં આવ્યો છે.

તાજેતરમાં દિલ્હીમાં પરીક્ષામાં કથિત અનિયમિતતાઓ સામે વિદ્યાર્થીઓ દ્વારા કરવામાં આવેલી 'સાંસદ ચલો' માર્ચ અને અન્ય મોટા પ્રદર્શનોના પૃષ્ઠભૂમિમાં આ સુનાવણી અત્યંત મહત્વપૂર્ણ બની રહે છે. સર્વોચ્ચ અદાલત હવે શાંતિપૂર્ણ વિરોધ કરવાના બંધારણીય અધિકાર અને સામાન્ય નાગરિકોના મુક્તપણે જીવવાના અધિકાર વચ્ચે યોગ્ય સંતુલન બનાવવાની દિશામાં કાનૂની ચકાસણી કરી રહી છે.