મુંબઈ: તા.12 ભારતીય શેરબજારમાં તાજેતરમાં જોવા મળેલી રિકવરી વચ્ચે એક મહત્વપૂર્ણ અહેવાલ સામે આવ્યો છે. અબાકસ મ્યુચ્યુઅલ ફંડના વિશ્લેષણ અનુસાર, ભારતના બેન્ચમાર્ક નિફ્ટી ઇન્ડેક્સને તેની ઓલટાઇમ હાઇ સપાટીએ પહોંચવા માટે હજુ પણ જુલાઈના અંતના સ્તરથી આશરે ૮ ટકાના વધારાની જરૂર છે. ૨ જાન્યુઆરી, ૨૦૨૬ ના રોજ ૨૬,૩૨૯ ની રેકોર્ડ ટોચ સ્પર્શ્યા બાદ નિફ્ટીમાં સુધારો જોવા મળ્યો હતો, પરંતુ લાર્જ-કેપ શેરોની સરખામણીએ સ્મોલકેપ અને મિડકેપ સૂચકાંકો પોતાની જૂની ટોચની ખૂબ જ નજીક પહોંચી ગયા છે.

આંકડાકીય વિશ્લેષણ દર્શાવે છે કે વ્યાપક બજારે (Broad Market) ધારણા કરતાં વધુ ઝડપી રિકવરી નોંધાવી છે. નિફ્ટી મિડકેપ ૧૫૦ ઇન્ડેક્સ ૨૧ જુલાઈ, ૨૦૨૬ ના રોજ નોંધાયેલા ૨૩,૧૭૧ ના ઓલટાઇમ હાઈ સ્તરથી હવે માત્ર ૦.૧૪ ટકા જ દૂર છે. જ્યારે નિફ્ટી સ્મોલકેપ ૨૫૦ ને સપ્ટેમ્બર ૨૦૨૪ ના તેના ૧૮,૬૨૩ ની સર્વોચ્ચ સપાટીએ પહોંચવા માટે માત્ર ૩.૯૨ ટકાના વધારાની જરૂર છે. આ વલણ સ્પષ્ટ કરે છે કે વર્તમાન સમયમાં રોકાણકારો મિડકેપ અને સ્મોલકેપ શેરોમાં વધુ રસ દાખવી રહ્યા છે.

અહેવાલમાં ૧૯૯૧ થી અત્યાર સુધીના ૩૫ વર્ષના ઐતિહાસિક ડેટાનું વિશ્લેષણ કરીને જણાવવામાં આવ્યું છે કે બજારમાં આવતા કરેક્શન એ ઇક્વિટી રોકાણની સામાન્ય પ્રક્રિયા છે. છેલ્લા ૩૫ વર્ષોમાં નિફ્ટી ૫૦ માં ૫ થી ૧૦ ટકાના નાના ઘટાડા ૨૭ વખત નોંધાયા છે, જે સરેરાશ દર ૧.૩ વર્ષે એક વાર બને છે. જ્યારે ૧૦ થી ૨૦ ટકાના મધ્યમ કરેક્શન ૧૩ વખત અને ૨૦ ટકાથી વધુના મોટા ઘટાડા માત્ર ૯ વખત (સરેરાશ દર ૩.૯ વર્ષે) જોવા મળ્યા છે.

બજારના ઇતિહાસમાં સૌથી મોટું કરેક્શન ૨૦૦૮ ની વૈશ્વિક નાણાકીય કટોકટી વખતે આવ્યું હતું, જેમાં નિફ્ટી તેની ટોચથી ૬૦ ટકા જેટલો ગગડ્યો હતો અને તેને સાજા થતાં ૧,૦૦૦ થી વધુ દિવસો લાગ્યા હતા. બીજી તરફ, ૨૦૨૦ ના કોવિડ ક્રેશમાં નિફ્ટી માત્ર ૬૯ દિવસમાં ૩૮.૪ ટકા તૂટ્યો હતો, પરંતુ તે પછી માત્ર ૩૦૦ દિવસના ટૂંકા ગાળામાં તેણે અદ્ભુત રિકવરી મેળવી લીધી હતી. આ આંકડા દર્શાવે છે કે દરેક કરેક્શન બાદ ભારતીય બજાર વધુ મજબૂતીથી બાઉન્સ બેક કરે છે.