નવી દિલ્હી : ભારતીય નૌકાદળ પોતાની દરિયાઈ સુરક્ષા અને યુદ્ધ ક્ષમતાને નવી ઊંચાઈઓ પર લઈ જવા માટે ઝડપથી કામ કરી રહ્યું છે. વર્ષ ૨૦૩૦ સુધીમાં દેશના તમામ ફ્રન્ટલાઈન મુખ્ય યુદ્ધ જહાજોને ભારત-રશિયાના સંયુક્ત સાહસથી બનેલી સુપરસોનિક ક્રૂઝ મિસાઇલ 'બ્રહ્મોસ' (BrahMos) થી સજ્જ કરવાની વ્યાપક યોજના ઘડી કાઢવામાં આવી છે. ઓપરેશનલ સફળતાઓ બાદ નૌકાદળે આ અભિયાનને અત્યંત ઝડપી બનાવી દીધું છે, જેનો મુખ્ય ઉદ્દેશ્ય દરિયાઈ ક્ષેત્રમાં લાંબા અંતર સુધી સચોટ હુમલો કરવાની ક્ષમતા મેળવવાનો અને પૂર્ણ આત્મનિર્ભરતા તરફ આગળ વધવાનો છે.

છેલ્લા એક જ વર્ષમાં નૌકાદળના કાફલામાં ૬ થી વધુ નવા બ્રહ્મોસ-સક્ષમ યુદ્ધ જહાજો સામેલ કરવામાં આવ્યા છે, જેનાથી બ્રહ્મોસથી સજ્જ જહાજોની કુલ સંખ્યા વધીને લગભગ ૨૦ થઈ ગઈ છે. નૌકાદળમાં સામેલ થઈ રહેલા નીલગિરી-ક્લાસ સ્ટીલ્થ ફ્રિગેટ્સ જેવા તમામ નવા જહાજો (જેમ કે INS ઉદયગિરી, INS હિમગિરી અને મહેન્દ્રગિરી) માં પહેલેથી જ આઠ વર્ટિકલી લોન્ચ બ્રહ્મોસ મિસાઇલો ફીટ કરવામાં આવી રહી છે, જ્યારે જૂના યુદ્ધ જહાજોમાં જૂની એન્ટી-સરફેસ મિસાઇલ સિસ્ટમ્સ હટાવીને બ્રહ્મોસ સિસ્ટમ રિટ્રોફિટ કરવાની કામગીરી પૂરજોશમાં ચાલી રહી છે.

આ વિસ્તરણ યોજનાને નાણાકીય અને નીતિગત પીઠબળ આપવા માટે કેન્દ્ર સરકારે ૨૨૦ થી વધુ બ્રહ્મોસ એક્સટેન્ડેડ રેન્જ મિસાઇલો તેમજ નવી ફાયર-કંટ્રોલ સિસ્ટમ્સ અને વર્ટિકલ લોન્ચર્સની ખરીદીને મંજૂરી આપી દીધી છે. ૨૦૩૦ ના અંત સુધીમાં નૌકાદળ પાસે ૨૦૦ થી વધુ બ્રહ્મોસ સજ્જ જહાજો તૈયાર હશે. વર્ષ ૨૦૪૭ સુધીમાં સંપૂર્ણપણે ૧૦૦% સ્વદેશી નૌકાદળ બનાવવાની ભારતની વ્યાપક મહત્વાકાંક્ષા માટે આ પગલું અત્યંત નિર્ણાયક અને ગેમ-ચેન્જર સાબિત થશે.