નવી દિલ્હી : કાવેરી નદીના પાણીની વહેંચણી અંગે તામિલનાડુ અને કર્ણાટક વચ્ચે ચાલી રહેલા વિવાદમાં સુપ્રીમ કોર્ટે બુધવારે મહત્વનો નિર્ણય લીધો છે. તામિલનાડુ સરકાર દ્વારા કર્ણાટક પાસે કાવેરી વોટર મેનેજમેન્ટ ઓથોરિટી (CWMA) ના આદેશ મુજબ તુરંત પાણી છોડાવવાની માંગ કરતી અરજી પર હવે ૧૭ ઓગસ્ટના રોજ સુનાવણી હાથ ધરવામાં આવશે. અગાઉ આ મામલે ૧૩ ઓગસ્ટે સુનાવણી નિયત કરવામાં આવી હતી, પરંતુ ખંડપીઠના અધ્યક્ષ જસ્ટિસ વિક્રમ નાથ વાયરલ ફીવરથી પીડાતા હોવાથી સુનાવણી મુલતવી રાખવામાં આવી છે.

ભારતના મુખ્ય ન્યાયાધીશ (CJI) સૂર્યા કાંતે માહિતી આપતા જણાવ્યું હતું કે, આ મામલાની સુનાવણી જસ્ટિસ વિક્રમ નાથની આગેવાની હેઠળની બેંચ દ્વારા જ કરવામાં આવશે, જેઓ આગામી સપ્તાહે ન્યાયિક કાર્યમાં પુનઃ જોડાવાની શક્યતા છે. સુનાવણી દરમિયાન તામિલનાડુના ખેડૂતો અને ડીએમકે વતી હાજર રહેલા વરિષ્ઠ એડવોકેટ પી. વિલ્સને અરજી પર તાકીદે સુનાવણી કરવા વિનંતી કરી હતી. તેમણે કોર્ટનું ધ્યાન દોર્યું હતું કે CWMA ના આદેશ છતાં કર્ણાટક દ્વારા જરૂરી પાણી છોડવામાં આવી રહ્યું નથી, જેના કારણે ડેલ્ટા વિસ્તારના ખેડૂતો અને કુરુવૈ પાકને ભારે નુકસાન થઈ રહ્યું છે.

ઉલ્લેખનીય છે કે, તામિલનાડુ સરકારે ૩ ઓગસ્ટે સુપ્રીમ કોર્ટના દરવાજા ખટખટાવ્યા હતા, જેમાં કાવેરી ઓથોરિટીના નિર્ણય મુજબ ૧૫ દિવસ માટે પ્રતિદિન ૩,૫૦૦ ક્યુસેક (કુલ ૪.૫૩૬ TMC) પાણીનો જથ્થો મુક્ત કરવાની માંગ કરવામાં આવી હતી. બીજી તરફ કર્નાટકે પોતાના જળાશયોમાં પાણીની અછત અને ઓછા વરસાદનું કારણ ધરીને પાણી છોડવા સામે વિરોધ દર્શાવ્યો છે. બે રાજ્યો વચ્ચેના આ આંતરરાજ્ય જળ વિવાદ પર હવે ૧૭ ઓગસ્ટે સુપ્રીમ કોર્ટની સુનાવણી પર દેશભરની નજર રહેશે.