કોલંબિયાના પશ્ચિમ વિસ્તારમાં આવેલા પેરિરા શહેરમાં વિનાશક ભૂકંપ બાદ એક ચમત્કારિક બચાવ સામે આવ્યો છે. ભૂકંપના લગભગ 36 કલાક બાદ 32 વર્ષની ડેનિએલા લાર્ગો સાંચેઝ મહિલાને કાટમાળ નીચેથી જીવતી બહાર કાઢવામાં આવી હતી. મંગળવારે રાત્રે બચાવકર્મીઓએ ડેનિએલાને ધરાશાયી થયેલી હોટેલના કાટમાળમાંથી બહાર કાઢી હતી. ભૂકંપે પેરિરા સહિત આસપાસના અનેક શહેરોમાં ભારે તબાહી મચાવી હતી. અનેક ઈમારતો ધરાશાયી થઈ હતી અને મોટી સંખ્યામાં લોકો કાટમાળ નીચે ફસાયા હતા. આવી સ્થિતિ વચ્ચે ડેનિએલાનું જીવતું મળી આવવું બચાવ અભિયાન  માટે મોટી સફળતા માનવામાં આવી રહ્યું છે.

બોમબેરોસ બોગોટા એટલે કે બોગોટા ફાયર ડિપાર્ટમેન્ટએ ડેનિએલાના બચાવની પુષ્ટિ કરી હતી. આ રેસ્ક્યુ ઓપરેશનમાં પેરિરા ફાયર ડિપાર્ટમેન્ટ અને વિશેષ ઇમરજન્સી તથા ડિઝાસ્ટર ઓપરેશન યુનિટ PONALSARની ટીમોએ સાથે મળીને કામગીરી કરી હતી. લાંબા સમય સુધી કાટમાળ નીચે દબાયેલી હોવા છતાં ડેનિએલા જીવતી મળી આવી હતી. બહાર કાઢ્યા બાદ તેમને તાત્કાલિક સ્થાનિક હોસ્પિટલમાં સારવાર માટે ખસેડવામાં આવ્યા હતા.

બચાવકર્મીઓ અને સ્વયંસેવકો આખો દિવસ ડેનિએલા ફસાઈ હતી તે વિસ્તારમાં કામગીરી કરી રહ્યા હતા. મંગળવારે બપોરે લગભગ 1 વાગ્યે કાટમાળ નીચેથી તેમની હાજરીનો અંદાજ આવ્યો હતો. ત્યારબાદ લગભગ 10 કલાક સુધી સતત ખોદકામ કરવામાં આવ્યું. ડેનિએલા સુધી પહોંચવા માટે રેસ્ક્યુ ટીમે કૉન્ક્રિટના 4 સ્તરો દૂર કર્યા હતા. આ દરમિયાન 2 અલગ-અલગ જગ્યાએથી ખોદકામ કરવામાં આવ્યું. ઉપરનો કાટમાળ વધુ ન ધસી પડે તે માટે ટીમે નીચેથી સુરંગ બનાવીને મહિલા સુધી પહોંચવાનો માર્ગ તૈયાર કર્યો હતો.

કાટમાળ નીચે ફસાયેલી ડેનિએલાને શ્વાસ લેવામાં મદદ મળે તે માટે ઓક્સિજન માસ્ક અને સિલિન્ડરનો ઉપયોગ કરવામાં આવ્યો હતો. સમગ્ર બચાવ કામગીરી દરમિયાન ટીમે અત્યંત સાવચેતી રાખી હતી, કારણ કે કાટમાળ અસ્થિર હતો અને આફ્ટરશોક્સનું જોખમ પણ સતત યથાવત હતું. જ્યારે ડેનિએલાને આખરે વાદળી ધાબળામાં લપેટીને બહાર લાવવામાં આવી ત્યારે ઘટનાસ્થળે હાજર પરિવારજનો, સ્વયંસેવકો અને બચાવકર્મીઓ ખુશીથી ચીસો પાડવા લાગ્યા હતા.

ડેનિએલાની માતા સાન્ડ્રા મિલેના પેરેઝએ જણાવ્યું હતું કે, એક સમયે તેમણે પોતાની પુત્રી જીવતી હોવાની આશા લગભગ છોડી દીધી હતી. જોકે, એક સ્થાનિક વ્યક્તિએ કાટમાળ નીચેથી અવાજ સાંભળ્યો હતો અને મદદ માટે કામગીરી શરૂ કરી હતી. આ વ્યક્તિની મદદના કારણે આખરે વ્યાવસાયિક બચાવ ટીમ ત્યાં પહોંચી શકી હતી. ઘરે ડેનિએલાનો 12 વર્ષનો પુત્ર તેની માતાની રાહ જોઈ રહ્યો હતો.

કોલંબિયાના રાષ્ટ્રપતિ અબેલારડો દ લા એસ્પ્રિએલાએ સોશિયલ મીડિયા પ્લેટફોર્મ X પર એક સંદેશ શેર કર્યો હતો, જેમાં ગૃહમંત્રી રોડ્રિગો લારાનું નિવેદન સામેલ હતું. ગૃહમંત્રીએ જણાવ્યું હતું કે, મહિલાને ધરાશાયી થયેલી હોટેલના કાટમાળમાંથી બહાર કાઢવામાં આવી છે અને હાલમાં તેમની હોસ્પિટલમાં સારવાર ચાલી રહી છે. રાષ્ટ્રપતિએ વધુમાં જણાવ્યું હતું કે પેરિરામાં હજુ પણ 40થી વધુ લોકોની શોધખોળ ચાલી રહી છે.

આ સફળ બચાવ એવા સમયે થયો છે જ્યારે સમગ્ર દેશમાં ભૂકંપ બાદ મૃત્યુઆંક 240થી વધુ થઈ ગયો હતો. સૈંકડો લોકો હજુ પણ કાટમાળ નીચે ફસાયેલા હોવાની આશંકા વ્યક્ત કરવામાં આવી હતી. સરકારે રાષ્ટ્રીય આપત્તિની સ્થિતિ જાહેર કરી છે અને બચાવ કામગીરી માટે ઉપલબ્ધ તમામ સંસાધનો કામે લગાડ્યા છે. આ ઘટના માત્ર એક મહિલાનો જીવ બચાવવાની ઘટના નથી, પરંતુ મુશ્કેલ પરિસ્થિતિમાં બચાવકર્મીઓની હિંમત, ધીરજ અને કુશળતાનું ઉદાહરણ પણ છે. સામાન્ય રીતે ભૂકંપ બાદના પ્રથમ 24થી 48 કલાક જીવ બચાવવા માટે સૌથી મહત્વપૂર્ણ ગણાય છે. આ સમયગાળામાં કાટમાળમાંથી જીવતા લોકોને બહાર કાઢવાની શક્યતા વધુ હોય છે.

પેરિરામાં અનેક ઈમારતો સંપૂર્ણપણે ધરાશાયી થઈ ગઈ હતી અને કોફી ઉત્પાદન માટે જાણીતા આ શહેરને ભૂકંપથી ભારે નુકસાન થયું હતું. બોગોટાથી આવેલી USAR ટીમે સ્થાનિક બચાવકર્મીઓ સાથે મળીને કામગીરી કરી હતી. આવી સંયુક્ત કામગીરી દ્વારા કાટમાળમાં ફસાયેલા વધુ લોકોને બચાવવાની આશા જળવાઈ છે.