વોશિંગ્ટન: તા.13 પશ્ચિમ એશિયામાં યુદ્ધની સ્થિતિ અત્યંત વિસ્ફોટક મોડ પર પહોંચી ગઈ છે. વિશ્વના સૌથી મહત્વપૂર્ણ દરિયાઈ તેલ માર્ગ ગણાતા હોર્મુઝ સ્ટ્રેટ (Strait of Hormuz) પર વર્ચસ્વ જમાવવા માટે અમેરિકા અને ઈરાન સામસામે આવી ગયા છે. અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ 'ટ્રુથ સોશિયલ' પર દાવો કર્યો છે કે આ વ્યૂહાત્મક માર્ગ પર અમેરિકી નૌસેનાનું સંપૂર્ણ અને અકાટ્ય નિયંત્રણ સ્થપાઈ ચૂક્યું છે. ટ્રમ્પે આ નાકેબંધીને 'સ્ટીલની દીવાલ' ગણાવતા ઈરાનને ઉશ્કેરણીજનક પગલાં ન ભરવા કડક ચેતવણી આપી છે.

અમેરિકાની આ આક્રમક ઘેરાબંદી સામે ઈરાને પણ નમતુ જોખવાનો સાફ ઈનકાર કરી દીધો છે. ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) ના વરિષ્ઠ સલાહકાર મોહમ્મદ રઝા નકદીએ સ્પષ્ટ રણનીતિ જાહેર કરતાં જણાવ્યું છે કે ઈરાન આ લડાઈને લાંબા સમય સુધી ખેંચવા માટે સંપૂર્ણ રીતે સક્ષમ છે. તેમણે ખુલ્લેઆમ ચેતવણી આપી છે કે જ્યાં સુધી ટ્રમ્પ રાષ્ટ્રપતિ પદેથી હટશે નહીં ત્યાં સુધી ઈરાન આ સંઘર્ષ ચાલુ રાખશે, જેથી દુશ્મનને ધીમે-ધીમે આર્થિક અને લશ્કરી રીતે નબળો કરી શકાય.

બંને દેશો વચ્ચે અગાઉ ૧૮ જૂનના રોજ થયેલો હંગામી શાંતિ કરાર પણ સંપૂર્ણપણે ભાંગી પડ્યો છે. અમેરિકાનો આરોપ છે કે ઈરાને કરાર મુજબ શિપિંગ માર્ગો ખોલ્યા નથી, જ્યારે ઈરાને દાવો કર્યો છે કે વોશિંગ્ટને ઈરાની બંદરો પરથી નાકેબંધી હટાવી નથી અને ફ્રીઝ કરેલી સંપત્તિ મુક્ત કરી નથી. આ ગંભીર તણાવના કારણે આંતરરાષ્ટ્રીય તેલ બજારમાં પણ ભારે અનિશ્ચિતતાનો માહોલ સર્જાયો છે, જ્યાં કાચા તેલની કિંમત ૮૮.૪૨ ડોલર પ્રતિ બેરલની સપાટીએ પહોંચી ગઈ છે.

પરિસ્થિતિ થાળે પાડવા પાકિસ્તાનના ગૃહમંત્રી મોહસિન નકવીએ તેહરાનની મુલાકાત લઈ મધ્યસ્થી કરવાનો પ્રયાસ કર્યો છે. બીજી તરફ, લાલ સમુદ્રમાં સ્થિતિ વધુ વણસી રહી છે જ્યાં ઈરાન સમર્થિત હુથી બળવાખોરોએ યમનના વેપારી જહાજ પર હુમલો કરી ૩ પાકિસ્તાની સહિત ૪ નાવિકોને મોતને ઘાટ ઉતાર્યા છે. આ હુમલાના જવાબમાં અમેરિકી સેનાએ ઈરાની બંદર તરફ જઈ રહેલા એક કન્ટેનર જહાજ પર ૨ મિસાઈલો છોડી આક્રમક જવાબી કાર્યવાહી કરી છે.