મુંબઈ: તા.13 મુંબઈના ઘાટકોપર વિસ્તારમાં આવેલા ચિરાગ નગરની ગૌશિયા ચાલી ખાતે બુધવારે વહેલી સવારે ૩:૩૫ વાગ્યાના સુમારે અચાનક ડુંગરનો એક મોટો ભાગ ધસી પડતાં ગંભીર ભૂસ્ખલનની ઘટના બની છે. આ કુદરતી આફતમાં અત્યાર સુધીમાં ૮ જેટલા કમનસીબ લોકોના મોત નીપજ્યા છે, જ્યારે અનેક લોકો કાટમાળ નીચે દબાઈ જવાથી ગંભીર રીતે ઘાયલ થયા છે. ચોમાસાની શરૂઆત પહેલાં જ તંત્રે વિસ્તાર ખાલી કરવાની નોટિસ આપી હતી, પરંતુ વિકલ્પ વગર રહેતા સ્થાનિકોએ હવે ભારે દર્દ સાથે કાનૂની અને આશ્રય સુરક્ષાની અપીલ કરી છે.

ભૂસ્ખલનના આ ભયાનક બનાવ બાદ અસરગ્રસ્ત પીડિતોએ પોતાનું દુઃખ વ્યક્ત કરતાં જણાવ્યું કે, "વરસાદ શરૂ થાય તે પહેલાં જ અમને નોટિસ ફટકારવામાં આવી હતી, પણ અમે આ ઘર છોડીને ક્યાં જઈએ? અમારી પાસે રહેવા માટે આ એકમાત્ર આશરો છે. જો સરકાર આ વિસ્તારને ચોમાસામાં અત્યંત સંવેદનશીલ ગણતી હોય, તો તેમણે અમને સુરક્ષિત જગ્યાએ પુનર્વસન આપવું જોઈએ અથવા પહાડ ધસતો રોકવા માટે પ્રોટેક્શન વોલ બનાવવી જોઈએ."

બીજી તરફ, વહીવટીતંત્રના અધિકારીઓએ દાવો કર્યો હતો કે ભૂસ્ખલન-સંભવિત આ ક્ષેત્રમાં રહેતા લોકોને વરસાદ પહેલાં જ સુરક્ષિત સ્થળે સ્થળાંતર કરવા માટે સ્પષ્ટ ચેતવણી આપતી નોટિસો આપવામાં આવી હતી. પરંતુ યોગ્ય રહેઠાણની વ્યવસ્થા ન હોવાથી સ્થાનિકોએ જીવના જોખમે ત્યાં જ રહેવું પડ્યું હતું અને અંતે આ મોટી હોનારત સર્જાઈ હતી.

ઘટનાની જાણ થતાં જ મુંબઈ ફાયર બ્રિગેડ, પોલીસ, બીએમસી, એનડીઆરએફ અને ૧૦૮ એમ્બ્યુલન્સની ટીમો ઘટનાસ્થળે દોડી ગઈ હતી અને ભારે કાટમાળ હટાવી બચાવ કામગીરી શરૂ કરી હતી. કાટમાળમાંથી બહાર કઢાયેલા તમામ ઈજાગ્રસ્તોને તાત્કાલિક ધોરણે સારવાર માટે નજીકની રાજાવાડી હોસ્પિટલમાં ખસેડવામાં આવ્યા છે. આ દુર્ઘટનાએ મુંબઈમાં પહાડી વિસ્તારોમાં રહેતા હજારો લોકોની સુરક્ષા સામે ફરી એકવાર મોટો પ્રશ્નાર્થ ચિહ્ન ઊભો કર્યો છે.