મુંબઈ :  સામાન્ય રીતે ગ્રામીણ વિસ્તારોમાં અંકુશ વગર ઉગતા અને ઉપેક્ષિત ગણાતા ફણસ (જેકફ્રૂટ) ની ખેતી હવે દેશના કૃષિ અર્થતંત્રને નવી દિશા આપવા માટે તૈયાર છે. મુંબઈ ખાતે આયોજિત એક પારિવારિક પ્રસંગ દરમિયાન રત્નાગીરીના ખેડૂત અને સફળ ઉદ્યોગસાહસિક મિથિલેશ દેસાઈ, જેઓ "જેકફ્રૂટ કિંગ" તરીકે ઓળખાય છે, તેમણે વડાપ્રધાન નરેન્દ્ર મોદી સાથે ખાસ ૧૨ થી ૧૩ મિનિટની મુલાકાત કરી હતી. આ બેઠક દરમિયાન દેશમાં ફણસની ખેતી, તેના પ્રોસેસિંગ અને તેમાંથી બનતી મૂલ્યવર્ધિત પ્રોડક્ટ્સના વૈશ્વિક માર્કેટિંગ અંગે અત્યંત સકારાત્મક અને ગહન ચર્ચા થઈ હતી.

મિથિલેશ દેસાઈએ વડાપ્રધાનને સમજાવ્યું કે તેમનો પરિવાર છેલ્લા ત્રણ દાયકાથી આ ક્ષેત્રે સંશોધન કરી રહ્યો છે. તેમણે પીએમ મોદીને ફણસમાંથી બનાવેલ ખાસ લોટ દર્શાવ્યો હતો, જે ડાયાબિટીસના દર્દીઓ માટે એક ઉત્તમ આહાર વિકલ્પ તરીકે કામ કરે છે. આ ઉપરાંત, ફણસના બીજમાંથી બનાવેલો લોટ પ્રોટીનનો એક જબરદસ્ત સ્ત્રોત છે. વડાપ્રધાન મોદીએ આ ટેકનોલોજી આધારિત પ્રયોગોમાં ભારે રસ દાખવ્યો હતો અને તેના ઉત્પાદન, વપરાશ તથા સંભવિત બજાર વિશે ઝીણવટભરી વિગતો મેળવીને દેસાઈના પ્રયાસોની સરાહના કરી હતી.

આ મુલાકાત બાદ મિથિલેશ દેસાઈએ આશા વ્યક્ત કરી હતી કે જો સરકાર તરફથી યોગ્ય પોલિસી અને સંગઠિત પ્લેટફોર્મ પૂરું પાડવામાં આવે, તો ભારતભરમાં એક વિશાળ 'જેકફ્રૂટ એગ્રી-ક્લસ્ટર' વિકસાવી શકાય છે. આ પહેલથી ખેડૂતોને માત્ર પોતાના પાકના યોગ્ય ભાવ જ નહીં મળે, પરંતુ ફૂડ પ્રોસેસિંગ, પેકેજિંગ અને લોજિસ્ટિક્સ ક્ષેત્રે ગ્રામીણ વિસ્તારોમાં રોજગારીની હજારો નવી તકો પણ ઊભી થશે. વડાપ્રધાન સાથેની આ ચર્ચાથી જેકફ્રૂટને દેશના મુખ્ય કૃષિ પાક તરીકે સ્થાપિત કરવામાં એક મોટી રાજકીય અને આર્થિક મુવમેન્ટ મળશે.