ટોક્યો :  રશિયન રાષ્ટ્રપતિ વ્લાદિમીર પુતિન દ્વારા વિવાદિત ઇતુરુપ ટાપુની મુલાકાત લીધા બાદ જાપાન અને રશિયા વચ્ચેનો ડિપ્લોમેટિક વિવાદ ચરમસીમાએ પહોંચી ગયો છે. જાપાનના વડા પ્રધાન સના તાકાઇચીએ ગુરુવારે પુતિનની આ મુલાકાત પર આકરો વિરોધ નોંધાવતા તેને "સંપૂર્ણપણે અસ્વીકાર્ય અને અસહ્ય" ગણાવી છે. જાપાન આ ટાપુને પોતાનો 'ઉત્તરીય પ્રદેશ' (એટોરોફુ) માને છે, જ્યારે રશિયા તેને દક્ષિણ કુરિલ ટાપુઓનો ભાગ ગણાવે છે. વડા પ્રધાન તાકાઇચીએ ચેતવણી આપી છે કે રશિયન રાષ્ટ્રપતિનું આ પગલું બંને દેશો વચ્ચેના સંબંધોને ગંભીર નુકસાન પહોંચાડશે અને જાપાનના લોકોમાં આક્રોશ વધારે છે.

ક્રેમલિન દ્વારા જાહેર કરાયેલા અહેવાલો મુજબ, રાષ્ટ્રપતિ પુતિને ઇતુરુપમાં આવેલા યાસ્ની ફિશ પ્રોસેસિંગ પ્લાન્ટની સમીક્ષા કરી હતી. ઉલ્લેખનીય છે કે, ચાર વિવાદિત ટાપુઓમાંથી કોઈ એકની રશિયન રાષ્ટ્રપતિ દ્વારા કરવામાં આવેલી આ પ્રથમ મુલાકાત છે. જાપાને અગાઉ મોસ્કોને વારંવાર અપીલ કરી હતી કે તેઓ આ વિસ્તારમાં રાષ્ટ્રપતિની મુલાકાત ન યોજે. જાપાનના સત્તાવાર સ્ટેન્ડ મુજબ, ૧૮૫૫ની શિમોડા સંધિ હેઠળ આ ટાપુઓ ઐતિહાસિક રીતે તેના જ પ્રદેશ રહ્યા છે, પરંતુ ઓગસ્ટ ૧૯૪૫માં બીજા વિશ્વયુદ્ધના અંતિમ દિવસોમાં સોવિયેત સૈનિકોએ તેના પર ગેરકાયદેસર કબજો જમાવી ૧૭,૦૦૦થી વધુ જાપાની નિવાસીઓને તારપાર કરી દીધા હતા.

બીજી તરફ, રશિયાનો દાવો છે કે બીજા વિશ્વયુદ્ધ પછી સાથી દેશો વચ્ચે થયેલા કરારો અને યાલ્ટા કોન્ફરન્સ મુજબ આ ટાપુઓ પર તેની સાર્વભૌમત્વ કાયદેસર છે. યુક્રેન યુદ્ધ શરૂ થયા બાદ જાપાને પશ્ચિમી દેશો સાથે મળીને રશિયા પર કડક આર્થિક પ્રતિબંધો લાદ્યા હતા, જેના કારણે બંને વચ્ચે શાંતિ કરારની વાટાઘાટો પહેલેથી જ બંધ થઈ ગઈ છે. વડા પ્રધાન તાકાઇચીએ સ્પષ્ટ કર્યું કે જાપાને વિવાદ ઉકેલવાના તમામ પ્રયાસો કર્યા હોવા છતાં પુતિનની આ ઉશ્કેરણીજનક મુલાકાતથી હવે બંને દેશો વચ્ચેના સંબંધો સુધરવાની શક્યતાઓ સંપૂર્ણપણે ધૂંધળી થઈ ગઈ છે.