નવી દિલ્હી : ભારતમાં ખાદ્ય તેલના વપરાશ અને આયાતને લઈને મહત્વના આંકડા સામે આવ્યા છે. પ્રોસેસિંગ ઈન્ડસ્ટ્રીના મુખ્ય સંગઠન સોલવન્ટ એક્સટ્રેક્ટર્સ એસોસિએશન ઓફ ઈન્ડિયા (SEA) દ્વારા જાહેર કરાયેલા તાજેતરના ડેટા અનુસાર, ચાલુ વર્ષના જુલાઈ મહિનામાં ભારતની ખાદ્ય તેલની આયાતમાં વાર્ષિક ધોરણે ૮ ટકાનો ઘટાડો નોંધાયો છે. જુલાઈ ૨૦૨૬માં આયાત ઘટીને ૧૪.૮૧ લાખ ટન રહી છે, જે ગયા વર્ષના સમાન મહિનામાં ૧૬.૧૬ લાખ ટન હતી.

અહેવાલ મુજબ, જુલાઈ ૨૦૨૬ દરમિયાન વનસ્પતિ તેલ (ખાદ્ય અને અખાદ્ય બંને) ની કુલ આયાત પણ ૭ ટકા ઘટીને ૧૫.૨૫ લાખ ટન પર આવી ગઈ છે, જે જુલાઈ ૨૦૨૫ માં ૧૬.૪૮ લાખ ટન હતી. જોકે, જો વર્તમાન તેલ વર્ષ (નવેમ્બર ૨૦૨૫ થી જુલાઈ ૨૦૨૬) ના પ્રથમ નવ મહિનાની વાત કરીએ તો, કુલ વનસ્પતિ તેલની આયાત ૧૧૬.૦૩ લાખ ટનથી વધીને ૧૨૧.૫૦ લાખ ટન સુધી પહોંચી છે.

આ આયાત પેટર્નમાં એક મોટો અને રસપ્રદ ફેરફાર જોવા મળ્યો છે. હવે ભારત પ્રોસેસ્ડ કે રિફાઈન્ડ તેલને બદલે કાચા (ક્રૂડ) તેલની આયાત પર વધુ ભાર મૂકી રહ્યું છે. આયાત બાસ્કેટમાં રિફાઈન્ડ તેલનો હિસ્સો ૧૪ ટકાથી ઘટીને માત્ર ૪ ટકા રહી ગયો છે, જ્યારે કાચા પામ તેલની આયાત વધવાને કારણે કાચા તેલનો હિસ્સો ૮૬ ટકાથી વધીને ૯૬ ટકા થઈ ગયો છે. ભારત પોતાની કુલ ખાદ્ય તેલની માંગના આશરે ૬૦ ટકા જેટલો જથ્થો આયાત દ્વારા પૂરો કરે છે, જેમાં મલેશિયા અને ઈન્ડોનેશિયાથી પામ તેલ તથા આર્જેન્ટિના અને બ્રાઝિલથી સોયાબીન તેલ મુખ્યત્વે ખરીદવામાં આવે છે.