હરિયાણાના અંબાલા કેન્ટમાં નેશનલ હાઈવે-44 (NH-44) પર મોડી રાત્રે સ્થિતિ અત્યંત તણાવપૂર્ણ બની હતી. શીખ સમુદાયના પ્રદર્શનકારીઓ દ્વારા કરવામાં આવેલા લગભગ 6 કલાક લાંબા રસ્તા રોકો આંદોલનને હટાવવા પહોંચેલી પોલીસ ટીમ પર અચાનક હુમલો અને પથ્થરમારો કરવામાં આવ્યો હતો. આ હુમલામાં એક DSP સહિત આશરે 6થી 7 પોલીસકર્મીઓ ગંભીર રીતે ઈજાગ્રસ્ત થયા હતા.

માહિતી મુજબ, પ્રદર્શનને કારણે NH-44 પર વાહનવ્યવહાર લગભગ 6 કલાક સુધી સંપૂર્ણપણે ઠપ થઈ ગયો હતો. હાઈવે ખુલ્લો કરાવવા માટે પોલીસ ઘટનાસ્થળે પહોંચી ત્યારે ભીડમાં રહેલા કેટલાક હથિયારધારી તોફાની તત્વોએ પોલીસકર્મીઓ પર હુમલો કર્યો અને પથ્થરો વરસાવ્યા હતા. પરિસ્થિતિ કાબૂમાં લેવા અને હાઈવે ખાલી કરાવવા પોલીસે ટિયર ગેસ (Tear Gas)ના ગોળા છોડ્યા હતા. ત્યારબાદ ભીડને વિખેરવા માટે લાઠીચાર્જ કરવામાં આવ્યો હતો.

પથ્થરમારામાં DSP વીરેન્દ્ર શર્માને અંગૂઠામાં ગંભીર ઈજા થઈ છે. ઉપરાંત કોન્સ્ટેબલ રક્ષિત અને નવીન કુમાર, હેડ કોન્સ્ટેબલ સંદીપ કુમાર તથા આસિસ્ટન્ટ સબ-ઇન્સ્પેક્ટર (ASI) સતીશ અને પંકજ પણ ઈજાગ્રસ્ત થયા છે. પંકજને આંગળીઓમાં ઈજા થઈ હોવાનું સામે આવ્યું છે. તમામ ઈજાગ્રસ્ત પોલીસકર્મીઓને સારવાર માટે અંબાલા કેન્ટની મિલિટરી હોસ્પિટલ અને સિવિલ હોસ્પિટલમાં દાખલ કરવામાં આવ્યા હતા.

પ્રાપ્ત માહિતી પ્રમાણે, શીખ સમુદાયના સભ્યો ઈન્ટરનેશનલ એન્ટી-ખાલિસ્તાની ટેરરિસ્ટ ફ્રન્ટના રાષ્ટ્રીય અધ્યક્ષ ગુરસિમરન સિંહ મંડની ધરપકડની માંગને લઈને NH-44 પર વિરોધ કરી રહ્યા હતા. લાંબા સમય સુધી ચાલેલા આ વિરોધને કારણે હાઈવે પર ભારે અવ્યવસ્થા સર્જાઈ હતી.

ઘટના બાદ હરિયાણા પોલીસના DGP અજય સિંધલ પોતે અંબાલા પહોંચ્યા હતા. તેમણે અંબાલા કેન્ટની મિલિટરી હોસ્પિટલ અને સિવિલ હોસ્પિટલમાં જઈને ઈજાગ્રસ્ત પોલીસકર્મીઓની મુલાકાત લીધી અને તેમના સ્વાસ્થ્યની માહિતી મેળવી હતી. આ દરમિયાન IG પંકજ નૈન, ડેપ્યુટી કમિશનર સચિન ગુપ્તા અને SDM કનિકા ગોયલ પણ હાજર રહ્યા હતા.

DGPએ ડોક્ટરો પાસેથી જવાનોની સારવાર અંગે માહિતી મેળવી અને સ્પષ્ટ સંદેશ આપ્યો કે હરિયાણા પોલીસ પોતાના કર્મચારીઓની સાથે મજબૂતીથી ઊભી છે. તેમણે કહ્યું કે, કાયદો અને વ્યવસ્થા જાળવવી પોલીસની સર્વોચ્ચ પ્રાથમિકતા છે. સાથે જ લોકોને અપીલ કરવામાં આવી કે તેઓ પોતાની વાત શાંતિપૂર્ણ રીતે રજૂ કરે, કાયદો હાથમાં ન લે અને હાઈવે પર અવરોધ ઊભો કરવાનું ટાળે.