દુબઈ: તા.14: જો તમે દુબઈ જવાની યોજના બનાવી રહ્યા છો અથવા અમીરાત (Emirates) એરલાઈન્સ દ્વારા મુસાફરી કરવાના છો, તો તમારા માટે એક ખૂબ જ ઉત્સાહજનક સમાચાર આવ્યા છે. હવે અમીરાત એરલાઈન્સે મુસાફરોને ધ્યાનમાં રાખીને એક અભૂતપૂર્વ નિર્ણય લીધો છે, જેના હેઠળ દુબઈ જતી ફ્લાઈટ્સ માટે તારીખ બદલવા પર લાગતો ચાર્જ સંપૂર્ણપણે નાબૂદ કરી દેવામાં આવ્યો છે. 10 ઓગસ્ટથી અમલી બનેલા આ નવા નિયમ મુજબ, મુસાફરો હવે કોઈ પણ હિડન કે એક્સ્ટ્રા ફી ચૂકવ્યા વિના ગમે તેટલી વખત પોતાની મુસાફરીની તારીખો બદલી શકશે. આ સુવિધા ઈકોનોમી અને બિઝનેસ ક્લાસના મોટાભાગના ભાડાં પર ઉપલબ્ધ કરાવાઈ છે.

સુગમતાના આ મહા-પેકેજમાં માત્ર તારીખ ફેરફાર જ નહીં, પરંતુ રિફંડ ફીમાં પણ ભારે કાપ મૂકવામાં આવ્યો છે. હવે ઈકોનોમી ક્લાસના મુસાફરો માટે રિફંડ ફી ઘટાડીને $25 થી $50 અને બિઝનેસ ક્લાસ માટે પણ તે મુજબ જ કરી દેવામાં આવી છે. આ સિવાય, જો તમે દુબઈ સિવાય એરલાઈન્સના વિશ્વવ્યાપી નેટવર્ક પર ગમે ત્યાં મુસાફરી કરી રહ્યા હોવ, તો પણ બુક કરાયેલી ટિકિટ પર એક ફ્રી ડેટ ચેન્જનો લાભ મળશે. મુસાફરો યોજનાને આખરી ઓપ આપતી વખતે કોઈ પણ જાતના વધારાના શુલ્ક વગર 24 કલાક સુધી પોતાનું ભાડું લોક (Hold) પણ રાખી શકશે.

અમીરાતે મુસાફરોના જોખમને ઘટાડવા માટે એક વિશેષ 'ટ્રાવેલ અને કોન્ફ્લિક્ટ કવર' નીતિ પણ રજૂ કરી છે. આ પોલિસી હેઠળ, અણધાર્યા સંજોગો કે સંઘર્ષની સ્થિતિમાં $25,000 સુધીના તબીબી ખર્ચની ભરપાઈ અને 30 દિવસ સુધી મફત ટ્રિપ એક્સ્ટેન્શન આપવામાં આવશે. સામાનમાં વિલંબ, ટિકિટ કેન્સલેશન કે એરસ્પેસ બંધ થવાને કારણે ફ્લાઈટ રદ થાય ત્યારે પણ એરલાઈન મુસાફરોને કોઈ વધારાના ખર્ચ વિના અન્ય ઓપ્શનમાં રી-બુક કરશે તથા સીધું રહેઠાણ પૂરું પાડશે.

આ ઉપરાંત, અમીરાત સ્કાયવર્ડ્સ (Emirates Skywards) સભ્યો માટે 31 ઓગસ્ટ સુધી ખાસ ધમાકા ઓફર ચાલુ છે. જેમાં સિલ્વર, ગોલ્ડ અને પ્લેટિનમ સ્ટેટસ મેળવવા માટે જરૂરી ટાયર માઈલ્સમાં 20% નો ઘટાડો કરાયો છે અને 20% બોનસ ટાયર માઈલ્સ પણ આપવામાં આવી રહ્યા છે. મુસાફરો હવે કેશ+માઈલ્સ દરનો ઉપયોગ કરીને અડધા દામમાં જ માઈલ્સ રિડીમ કરી શકશે. એરલાઈન્સના આ ગ્રાહક-સ્નેહી પગલાંથી હવે દુબઈ અને અન્ય દેશોની મુસાફરી ટેન્શન-ફ્રી અને વધુ આકર્ષક બની ગઈ છે.