નવી મુંબઈ:  નવી મુંબઈના સાનપાડા સેક્ટર-૧૧ ખાતે બહુપ્રતિક્ષિત ₹૪૧.૧૧ કરોડના ખર્ચે નિર્માણ પામેલી અત્યાધુનિક 'સેન્ટ્રલ લાઇબ્રેરી'નું આ જ મહિને ઉદ્ઘાટન થવા જઈ રહ્યું છે. નવી મુંબઈ મ્યુનિસિપલ કોર્પોરેશન (NMMC) દ્વારા તૈયાર કરવામાં આવેલું આ પાંચ માળનું વિશાળ નોલેજ હબ નાગરિકોમાં વાંચન સંસ્કૃતિને પ્રોત્સાહન આપવા તેમજ વિદ્યાર્થીઓ અને કલાકારો માટે એક ઉત્કૃષ્ટ સાંસ્કૃતિક કેન્દ્ર તરીકે સેવા આપશે.

પર્યાવરણાનુકૂળ ગ્રીન બિલ્ડિંગ કોન્સેપ્ટ આધારિત આ લાઇબ્રેરીમાં તમામ વયજૂથના નાગરિકો માટે વિશેષ સુવિધાઓ ઊભી કરવામાં આવી છે. ગ્રાઉન્ડ ફ્લોર પર દિવ્યાંગો માટે બ્રેઇલ વિભાગ, પ્રથમ માળે વરિષ્ઠ નાગરિકો માટે વિશેષ બેઠક વ્યવસ્થા અને ત્રીજા માળે ઈ-લાઇબ્રેરી તેમજ ડિજિટલ લેંગ્વેજ લેબ બનાવવામાં આવી છે. આ ઉપરાંત, મરાઠી, હિન્દી અને અંગ્રેજી સાહિત્યના હજારો પુસ્તકો સાથે ૧૩૦ સીટો ધરાવતું આધુનિક ઓડિટોરિયમ અને કેફેટેરિયા પણ આ કેમ્પસનો હિસ્સો છે.

વિદ્યાર્થીઓ માટે આ સેન્ટ્રલ લાઇબ્રેરી અત્યંત આશીર્વાદરૂપ સાબિત થશે. ઇમારતના પાંચમા માળે UPSC, MPSC, બેંકિંગ અને રેલ્વે જેવી સ્પર્ધાત્મક પરીક્ષાઓની તૈયારી કરતા વિદ્યાર્થીઓ માટે વિશેષ વર્ગખંડો તૈયાર કરવામાં આવ્યા છે. ચોથા માળે ૨૪૫ ચોરસ મીટરમાં ફેલાયેલી ભવ્ય આર્ટ ગેલેરી કલાપ્રેમીઓ માટે પ્રદર્શનો યોજવા સમર્પિત રહેશે. સમગ્ર ઇમારતમાં ઇવી ચાર્જિંગ સ્ટેશન અને સોલાર પેનલ સિસ્ટમ જેવી પર્યાવરણપૂરક સુવિધાઓ પણ ઉપલબ્ધ કરાવવામાં આવી છે.