વોશિંગ્ટન:અમેરિકાની વર્જિનિયા સ્ટેટ યુનિવર્સિટી (VSU) કેમ્પસમાં શનિવારે વહેલી સવારે ગોળીબારની એક ભયાનક ઘટના સામે આવી છે, જેમાં પાંચ લોકો ગંભીર રીતે ઘાયલ થયા છે. કેમ્પસના ક્વાડ એનેક્સ અને બોઇસો સ્ટ્રીટના ૩૩૦૦ બ્લોક પર આવેલા રહેણાંક હોલ નજીક સવારે આશરે ૧:૨૮ વાગ્યે અચાનક ફાયરિંગ શરૂ થતાં ભારે અફરાતફરી મચી ગઈ હતી. ઘટનાની જાણ થતાં જ સુરક્ષા દળો ઘટનાસ્થળે પહોંચી ગયા હતા અને તમામ ઘાયલોને તાત્કાલિક નજીકની હોસ્પિટલમાં ખસેડવામાં આવ્યા હતા, જ્યાં એક વ્યક્તિની હાલત અત્યંત ગંભીર હોવાનું કહેવાય છે.

ઘટના બાદ યુનિવર્સિટી તંત્ર દ્વારા સાવચેતીના ભાગરૂપે તાત્કાલિક કેમ્પસમાં લોકડાઉન લાદી દેવામાં આવ્યું હતું. ત્યારબાદ સ્થિતિ નિયંત્રણમાં આવતાં લોકડાઉન હટાવી લેવામાં આવ્યું છે, પરંતુ કેમ્પસ અને આસપાસના વિસ્તારોમાં હજુ પણ પોલીસનો કડક બંદોબસ્ત ખડકી દેવાયો છે.

આ હિંસક ઘટનાની તપાસ હાલમાં ચેસ્ટરફિલ્ડ કાઉન્ટી પોલીસ દ્વારા કરવામાં આવી રહી છે, જેમાં VSU પોલીસ, ATF અને હેનોવર કાઉન્ટી શેરિફ ઓફિસ પણ સહયોગ આપી રહી છે. ગોળીબાર પાછળનું સાચું કારણ અને હુમલાખોરોની ઓળખ માટે પોલીસે ડિજિટલ પુરાવાઓ તેમજ આસપાસના વિસ્તારોની તપાસ તેજ કરી છે.