મુંબઈ: તા.૧૫ મહારાષ્ટ્ર રાજ્ય માનવ અધિકાર પંચે મુંબઈની નાગરિક હોસ્પિટલોમાં મેડિકો-લીગલ કેસ (MLC) મસ્ટરની જાળવણી અને નીતિઓ અંગે કડક વલણ અપનાવ્યું છે. MCGM દ્વારા સંચાલિત હોસ્પિટલોમાં એમએલસી મસ્ટર જાળવવા સંબંધિત નિયમો અને નીતિઓની વિગતો રજૂ કરવામાં નિષ્ફળ રહેવા બદલ કમિશને ડેપ્યુટી મ્યુનિસિપલ કમિશનર (જાહેર આરોગ્ય) અને પેરિફેરલ હોસ્પિટલ્સના મુખ્ય તબીબી અધિક્ષકને સમન્સ પાઠવ્યા છે. જો નિર્ધારિત તારીખ સુધીમાં વિગતો નહીં રજૂ થાય તો કાનૂની કાર્યવાહી કરવાની પણ ચેતવણી આપવામાં આવી છે.

આ સમગ્ર મામલો સિંહલ ગણવીર દ્વારા દાખલ કરવામાં આવેલી એક ફરિયાદ પર આધારિત છે, જેમાં આરોપ મૂકવામાં આવ્યો હતો કે કેટલીક નાગરિક હોસ્પિટલો, ખાસ કરીને મલાડ પૂર્વની એમ. ડબલ્યુ. દેસાઈ મ્યુનિસિપલ જનરલ હોસ્પિટલ દ્વારા એમએલસી રજિસ્ટર જાળવવામાં આવતું નહોતું. જેના કારણે મેડિકો-લીગલ પ્રકૃતિના કેસો સાથે આવતા દર્દીઓને યોગ્ય સારવાર આપવાને બદલે માત્ર નોંધણી માટે અન્યત્ર રીફર કરવામાં આવતા હતા, અને પોલીસને પણ સમયસર જાણ કરવામાં આવતી નહોતી. આ ગંભીર બેદરકારીના કારણે દર્દીઓને ભારે અસુવિધાનો સામનો કરવો પડતો હતો.

જોકે, સુનાવણી દરમિયાન હોસ્પિટલ વતી રજૂ કરાયેલા અહેવાલમાં સ્પષ્ટ કરવામાં આવ્યું હતું કે હવે હોસ્પિટલ દ્વારા એમએલસી મસ્ટર જાળવવાનું શરૂ કરી દેવામાં આવ્યું છે અને ઓક્ટોબર ૨૦૨૫ થી માર્ચ ૨૦૨૬ દરમિયાન ૨૦૮ એમએલસી દર્દીઓની નોંધણી પણ કરવામાં આવી છે. હોસ્પિટલે આ કેસોને હેન્ડલ કરવા માટે સ્ટાન્ડર્ડ ઓપરેટિંગ પ્રોસિજર (SOP) પણ તૈયાર કરી લીધી છે. તેમ છતાં, પંચનું માનવું છે કે માત્ર એક હોસ્પિટલનો મુદ્દો ઉકેલાયો છે, પરંતુ સમગ્ર MCGM હસ્તકની હોસ્પિટલોમાં આ અંગે અનુસરવામાં આવતી નીતિઓની વ્યાપક તપાસ થવી જરૂરી છે.

આ મામલાની આગામી સુનાવણી આગામી ૨૭ ઓગસ્ટના રોજ હાથ ધરવામાં આવશે. મેડિકો-લીગલ કેસો જેવા કે અકસ્માત, હુમલો અથવા શંકાસ્પદ ઇજાઓમાં દર્દીઓને સમયસર તબીબી સહાય મળે અને કાનૂની પ્રક્રિયા સમયસર શરૂ થાય તે માટે આવા રજિસ્ટરની જાળવણી અત્યંત આવશ્યક હોવાનું પંચે રેખાંકિત કર્યું છે.