રાજકોટઃ ઘાટકોપરના ધારા સભ્‍ય પરાગભાઈ શાહના ૫૭મા જન્‍મદિન નિમિત્તે રાષ્‍ટ્રસંત પરમ ગુરૂદેવ શ્રી નમ્રમુનિ મહારાજ સાહેબની પ્રેરણાથી ઘાયલ, બીમાર અને દર્દથી પીડાતાં અબોલ પશુ-પંખીઓને સઘન તથા સુયોગ્‍ય સારવાર મળી રહે તે હેતુથી ઘાટકોપરના રાજાવાડી વિસ્‍તારમાં ‘હિંદુ હૃદયસમ્રાટ શ્રી બાલાસાહેબ ઠાકરે પશુ આરોગ્‍ય ભવન - ઓલ્‍વેઝ કેર એનિમલ હોસ્‍પિટલ'નું મંગલ ઉદ્ધાટન કરવામાં આવ્‍યું. હોસ્‍પિટલમાં બિલાડીઓ અને શ્વાન માટે અલગ સારવાર વિભાગ, સર્જરી માટે વિશેષ સુવિધા, એક્‍સ-રે, સોનોગ્રાફી, પેથોલોજી તપાસ, નવજાત પશુઓ માટે વિશેષ સંભાળ કેન્‍દ્ર, બિલાડીઓ તથા શ્વાન માટે દાખલ સારવારની સુવિધા, પક્ષીઓ માટે વિશેષ સારવાર વિભાગ ઉપરાંત બેઠક-તાલીમ કક્ષ, આહાર વ્‍યવસ્‍થા, પશુઓના સ્‍વસ્‍થ થવા માટે વિશેષ સ્‍થળ જેવી અનેક સુવિધાઓ ઉપલબ્‍ધ રહેશે.