નવી દિલ્હી : સ્વતંત્રતા દિવસની ઉજવણી પહેલા દેશને મોટી હોનારતમાંથી બચાવી લેતા ભારતીય સુરક્ષા એજન્સીઓએ પાકિસ્તાની ગુપ્તચર એજન્સી ISI દ્વારા સમર્થિત 'શહઝાદ ભટ્ટી નેટવર્ક' વિરુદ્ધ અત્યાર સુધીનું સૌથી મોટું ઓપરેશન પાર પાડ્યું છે. કેન્દ્રીય ગૃહમંત્રી અમિતભાઈ શાહે જાહેરાત કરી છે કે વડાપ્રધાન નરેન્દ્રભાઈ મોદીની આતંકવાદ સામેની 'ઝીરો ટોલરન્સ' નીતિ હેઠળ દેશના ૧૪ રાજ્યોમાં એક સાથે દરોડા પાડીને ૨૫૩ શંકાસ્પદ લોકોની અટકાયત કરવામાં આવી છે. આ નેટવર્ક વિરુદ્ધ અત્યાર સુધીમાં ૮૦ થી વધુ FIR નોંધાઈ છે અને ૨૦૦ થી વધુ આતંકી સહયોગીઓની વિધિવત ધરપકડ કરી લેવામાં આવી છે.

ગૃહમંત્રી અમિતભાઈ શાહે સોશિયલ મીડિયા પર આ સફળતાની વિગતો આપતાં જણાવ્યું હતું કે સુરક્ષા દળોએ ૧૨ ઓગસ્ટથી જ વાસ્તવિક સમયની ગુપ્ત માહિતીના આધારે રાજ્ય પોલીસ દળો સાથે મળીને આ સંયુક્ત ઓપરેશન શરૂ કર્યું હતું. આ કાર્યવાહી દરમિયાન દેશના વિવિધ ખૂણેથી IED, પાકિસ્તાન ઓર્ડનન્સ ફેક્ટરીના માર્કિંગવાળા હેન્ડ ગ્રેનેડ, આધુનિક પિસ્તોલો, જીવંત કારતૂસ અને જાસૂસી માટે ઉપયોગમાં લેવાતા સર્વેલન્સ કેમેરા જપ્ત કરવામાં આવ્યા છે. જપ્ત કરાયેલ શસ્ત્રોનો જથ્થો દર્શાવે છે કે આ નેટવર્કના તાર સીધા સરહદ પારથી જોડાયેલા હતા.

તપાસ એજન્સીઓના જણાવ્યા મુજબ, શહઝાદ ભટ્ટી નેટવર્ક પાકિસ્તાનથી સંચાલિત એક ખતરનાક આતંકી સિન્ડિકેટ છે, જેને ISI નું પૂર્ણ સમર્થન પ્રાપ્ત છે. આ નેટવર્ક ભારતમાં મહત્વપૂર્ણ પોલીસ મથકો, સંરક્ષણ સ્થાપનો અને પ્રખ્યાત ધાર્મિક સ્થળોની જાસૂસી કરવા માટે સ્થાનિક યુવાનોને મોટા પ્રમાણમાં નાણાં ચૂકવતું હતું. તેઓએ અનેક સંવેદનશીલ સ્થળો પર ગુપ્ત સર્વેલન્સ કેમેરા પણ ફિટ કર્યા હતા, જેથી લક્ષિત હત્યાઓ (Targeted Killings) અને ગ્રેનેડ કે પેટ્રોલ બોમ્બ હુમલા કરી શકાય.

આ દેશવ્યાપી ઓપરેશનમાં સૌથી વધુ ઉત્તર પ્રદેશમાંથી ૬૨, હરિયાણામાંથી ૫૨, દિલ્હીમાંથી ૫૧ અને પંજાબમાંથી ૪૪ લોકોની અટકાયત કરવામાં આવી છે. આ ઉપરાંત રાજસ્થાન, મહારાષ્ટ્ર, ઉત્તરાખંડ, ગુજરાત, કર્ણાટક, બિહાર, તેલંગાણા, હિમાચલ પ્રદેશ, જમ્મુ-કાશ્મીર અને કેરળમાંથી પણ શંકાસ્પદોની ઘરપકડ કરાઈ છે. આ શંકાસ્પદો સામે ગેરકાયદેસર પ્રવૃત્તિઓ નિવારણ અધિનિયમ (UAPA), શસ્ત્ર નિર્ધારણ કાયદા અને NDPS એક્ટ હેઠળ ગુના નોંધીને નેટવર્કને મૂળમાંથી ઉખાડી ફેંકવાની કામગીરી ચાલી રહી છે.