નવી દિલ્હી  : સરકારી માલિકીની ઓઇલ એન્ડ નેચરલ ગેસ કોર્પોરેશન (ONGC) માટે એક અત્યંત મહત્વના અને મોટા સમાચાર સામે આવ્યા છે. યુએસ ટ્રેઝરી ઓફિસ ઓફ ફોરેન એસેટ્સ કંટ્રોલ (OFAC) તરફથી ONGC ને ખાસ લાયસન્સ પ્રાપ્ત થયું છે, જેનાથી કંપની વર્ષોથી લાગેલા કડક યુએસ પ્રતિબંધો પછી હવે વેનેઝુએલામાં પોતાની સંપૂર્ણ કામગીરી ફરી શરૂ કરી શકશે. આ મંજૂરી મળતાં જ ONGC ને વેનેઝુએલામાં તેની સંપત્તિઓમાં મોટું રોકાણ કરવા, તેલ ઉત્પાદન ઝડપથી વધારવા તેમજ સ્થાનિક સત્તાવાળાઓ સાથે નવી વાટાઘાટો કરવાની સંપૂર્ણ સુગમતા મળી ગઈ છે. 

ONGC ની વિદેશી રોકાણ શાખા 'ONGC વિદેશ લિમિટેડ' (OVL) સાન ક્રિસ્ટોબલ તેલ પ્રોજેક્ટમાં ૪૦% નો મોટો હિસ્સો ધરાવે છે, જ્યારે બાકીનો હિસ્સો વેનેઝુએલાની સરકારી કંપની PDVSA પાસે છે. આ ઉપરાંત OVL પાસે વિકાસ હેઠળના કારાબોબો પ્રોજેક્ટમાં પણ ૧૧% હિસ્સો છે. ONGC ના ડિરેક્ટર-ફાઇનાન્સ અનુપમ અગ્રવાલે જણાવ્યું હતું કે, આ લાયસન્સ મળવાથી પ્રતિબંધો સંબંધિત તમામ જોખમો દૂર થયા છે. આ લાયસન્સના કારણે વેનેઝુએલાના રોકાણમાંથી અટકેલા $૫૦૦ મિલિયનથી વધુના બાકી ડિવિડન્ડ મેળવવાનો રસ્તો પણ સાફ થઈ ગયો છે. 

કંપનીની ગણતરી મુજબ, સાન ક્રિસ્ટોબલ પ્રોજેક્ટે નાણાકીય વર્ષ ૨૦૨૬ માં આશરે ૦.૨૬૫ મિલિયન ટન તેલનું ઉત્પાદન કર્યું હતું, જે તેની વાસ્તવિક ક્ષમતાના માત્ર ૧૦મા ભાગ જેટલું જ છે. પ્રતિબંધો હળવા થતાં ONGC હવે ત્યાં મોટું નવું રોકાણ કરીને ઉત્પાદન અનેક ગણું વધારવાની દિશામાં આગળ વધી રહી છે. ઉલ્લેખનીય છે કે, OPEC ના અંદાજ મુજબ વેનેઝુએલા પાસે વિશ્વનો સૌથી મોટો આશરે ૩૦૩ બિલિયન બેરલનો સાબિત ક્રૂડ ઓઇલ ભંડાર છે.

વર્ષોના ઓછા રોકાણ અને ઓપરેશનલ પડકારો બાદ વેનેઝુએલાનો નવો પેટ્રોલિયમ કાયદો હવે અનેક નાણાકીય પ્રોત્સાહનો આપી રહ્યો છે. ONGC ખાસ કરીને દરિયા કિનારાના ક્ષેત્રોમાં રસ ધરાવે છે, જ્યાં પશ્ચિમ ભારતના પોતાના વિશાળ અનુભવનો ઉપયોગ કરી શકાશે. વૈશ્વિક ભૂરાજકીય અનિશ્ચિતતાઓ વચ્ચે ભારત પોતાની ઉર્જા જરૂરિયાતો માટે વિદેશી સંસાધનોનું વૈવિધ્યીકરણ કરવા માંગે છે ત્યારે ONGC ની આ સફળતા દેશની ઉર્જા સુરક્ષાને વધુ મજબૂત બનાવશે.