નવી દિલ્હી : ટાટા ગ્રૂપની સૌથી નાની લિસ્ટેડ કંપની નેલ્કો લિમિટેડે દેશના ટેલિકોમ ક્ષેત્રે એક અસાધારણ અને ક્રાંતિકારી પગલું ભર્યું છે. ભવિષ્યની સંચાર પ્રોદ્યોગિકીને આકાર આપવા માટે નેલ્કોએ યુએસ સ્થિત સેટેલાઈટ કંપની લુનર હોલ્ડકો (Lunar HoldCo) સાથે $20 મિલિયન (આશરે ₹167 કરોડ)ની વિશાળ વ્યૂહાત્મક ભાગીદારી અને રોકાણની જાહેરાત કરી છે. ટાટા પાવરની આ પેટાકંપની, જેનું માર્કેટ કેપ આશરે ₹2,464 કરોડ છે, તે ભારતમાં ડાયરેક્ટ-ટુ-ડિવાઈસ (D2D) ટેકનોલોજીનો નવો યુગ શરૂ કરવા જઈ રહી છે.

આ કરાર હેઠળ નેલ્કો ફરજિયાત રૂપાંતરિત ડિબેન્ચર્સ (CCDs) મારફતે લુનર હોલ્ડકોમાં રોકાણ કરશે, જેના પર કંપનીને વાર્ષિક 7% નું ચક્રવૃદ્ધિ વળતર મળશે. આ ભાગીદારીનો મુખ્ય હેતુ ભારત તેમજ સમગ્ર દક્ષિણ એશિયામાં આગામી પેઢીની ડાયરેક્ટ-ટુ-ડિવાઈસ (D2D) અને ઈન્ટરનેટ ઓફ થિંગ્સ (IoT) કનેક્ટિવિટી વિકસાવવાનો છે. D2D ટેકનોલોજી દ્વારા યુઝર્સના સામાન્ય સ્માર્ટફોન અને અન્ય ડિવાઈસ સીધા જ અવકાશમાં રહેલા સેટેલાઈટ સાથે કનેક્ટ થઈ શકશે. આ ટેકનોલોજીથી ભવિષ્યમાં પરંપરાગત મોબાઈલ સિમ-ટાવર્સ કે નેટવર્ક કવરેજ વિના પણ હાઈ-સ્પીડ કનેક્શન શક્ય બનશે.

આ ક્રાંતિકારી સેટેલાઈટ નેટવર્કથી દૂરદૂરના પહાડી વિસ્તારો, દરિયાઈ ક્ષેત્રો, ડિઝાસ્ટર મેનેજમેન્ટ અને નેવિગેશન જેવા મહત્વપૂર્ણ ક્ષેત્રોમાં મોટો બદલાવ આવશે. નેટવર્ક નિષ્ફળતા અથવા કુદરતી આપત્તિ વખતે પણ સંચાર વ્યવસ્થા અવિરત ચાલુ રહેશે, જે સરકારી સુરક્ષા અને રાહત કામગીરી માટે પણ અત્યંત ઉપયોગી સાબિત થશે. ઉલ્લેખનીય છે કે, લુનર હોલ્ડકો એ યુએસની લિંક ગ્લોબલ અને ઓમ્નિસ્પેસના મર્જરથી બનેલી પ્રમુખ કંપની છે. ટાટાની આ દૂરંદેશી યોજનાથી ભારત વિશ્વના સૌથી અદ્યતન સેટેલાઈટ કનેક્ટિવિટી ધરાવતા દેશોની હરોળમાં સ્થાન મેળવવા જઈ રહ્યું છે.