બેંગલુરુ  : બેંગલુરુના રિચર્ડ્સ ટાઉન વિસ્તારમાં આવેલી ક્લેરન્સ હાઈ સ્કૂલમાં મોટા પાયે ફ્લૂ જેવા રોગચાળાના લક્ષણો જોવા મળતાં વાલીઓ અને શાળા તંત્રમાં ચિંતા ફેલાઈ છે. શાળા તંત્રના જણાવ્યા પ્રમાણે ૫૦૦થી વધુ વિદ્યાર્થીઓ અને ૨૧ કર્મચારીઓ તાવ, શરદી, ઉધરસ તથા શરીરદર્દથી પીડાઈ રહ્યા છે. અત્યાર સુધી બે વિદ્યાર્થીઓના પરીક્ષણમાં એચ૧એન૧નો ચેપ હોવાની પુષ્ટિ થઈ છે, જ્યારે એક કર્મચારી બેંગલુરુની બેપ્ટિસ્ટ હોસ્પિટલમાં સારવાર હેઠળ હોવાનું જણાવાયું છે. એચ૧એન૧ (સ્વાઇન ફ્લૂ) એક વાયરસજન્ય શ્વસન રોગ છે જે શ્વાસના માર્ગને અસર કરે છે અને ખાંસી, છીંક અથવા નજીકના સંપર્ક દ્વારા ઝડપથી ફેલાઈ શકે છે. તેની ગંભીરતા વ્યક્તિની રોગપ્રતિકારક શક્તિ પર આધાર રાખે છે; મોટાભાગના કેસોમાં તે સામાન્ય ફ્લૂ જેવા લક્ષણો સાથે સાજો થઈ જાય છે, પરંતુ કેટલાક કેસોમાં ખાસ કરીને બાળકો, વૃદ્ધો, ગર્ભવતી મહિલાઓ અને પહેલેથી બીમાર લોકોમાં ન્યુમોનિયા જેવી ગંભીર જટિલતાઓ પણ ઊભી કરી શકે છે. સમયસર સારવાર ન મળે તો તે જોખમી બની શકે છે, જોકે યોગ્ય સારવાર અને એન્ટિવાયરલ દવાઓથી તેને નિયંત્રિત કરી શકાય છે.

સાવચેતીના પગલારૂપે શાળામાં પ્રત્યક્ષ વર્ગો સ્થગિત કરી કેમ્પસને આવતીકાલે મંગળવાર સુધી બંધ રાખવાનો નિર્ણય લેવાયો છે. સામાજિક માધ્યમોમાં પણ આ ઘટનાની વ્યાપક ચર્ચા થઈ રહી છે. જોકે, શાળા સાથે જોડાયેલા તમામ ૫૦૦થી વધુ બીમાર વિદ્યાર્થીઓને એચ૧એન૧ થયો હોવાનું માનવું યોગ્ય નથી. આ તમામમાં ફ્લૂ જેવા લક્ષણો છે અને હાલમાં માત્ર બે કેસમાં એચ૧એન૧ની પુષ્ટિ થઈ છે.

શાળા સંચાલકોએ કેમ્પસની આસપાસ ઊભા રહેતા સ્ટ્રીટ ફૂડ તથા અન્ય વિક્રેતાઓ અંગે પણ સ્થાનિક સત્તાવાળાઓ સમક્ષ ગંભીર ચિંતા વ્યક્ત કરી છે. શાળાનો આક્ષેપ છે કે આસપાસ ખાદ્ય કચરો અને ગંદકી એકઠી થવાથી આરોગ્ય જોખમ વધી રહ્યું છે. ક્લાર્ક રોડ તરફ આવેલા કિન્ડરગાર્ટનના પ્રવેશદ્વાર પાસે વિક્રેતાઓના કારણે અવરોધ અને કચરાની સમસ્યા થતી હોવાનું પણ તંત્રએ રજૂઆતમાં જણાવ્યું છે. પોટરી રોડ અને જોન આર્મસ્ટ્રોંગ રોડના જંક્શન નજીકના એક ખાદ્ય વિક્રેતા અંગે પણ સફાઈની ફરિયાદ કરવામાં આવી છે.

શાળાએ શિક્ષણ અધિકારી અને શહેરના આરોગ્ય અધિકારી સમક્ષ રજૂઆત કરીને આસપાસના ખાદ્ય વિક્રેતાઓની તાત્કાલિક આરોગ્ય-સલામતી તપાસ, ગંદકી દૂર કરવા તથા શૈક્ષણિક સંસ્થાઓની નજીક બિનઆરોગ્યબદ્ધ ખાદ્યપદાર્થોના વેચાણ સામે કાર્યવાહી કરવાની માંગ કરી છે. તંત્રનું કહેવું છે કે પરિસ્થિતિને ગભરાટ વિના સંભાળવામાં આવી રહી છે, પરંતુ ચેપ વધુ ન ફેલાય તે માટે સત્તાવાળાઓનો તાત્કાલિક સહયોગ જરૂરી છે.