નવી દિલ્હી, તા. 18  : ભાજપના રાષ્ટ્રીય પ્રવક્તા શહેઝાદ પૂનાવાલાએ પાર્ટીના તમામ પદો પરથી રાજીનામું આપી દીધું છે. તેમણે રાજીનામાનું કારણ જાહેર કરતા કહ્યું કે તેમને પાર્ટીમાંથી કોઈ પ્રકારનો પગાર કે આર્થિક મદદ મળતી નહોતી, જેના કારણે તેમણે આ નિર્ણય લીધો છે.

શહેઝાદ પૂનાવાલાએ એક નિવેદનમાં જણાવ્યું કે છેલ્લા ઘણા સમયથી તેઓ પાર્ટી માટે કામ કરી રહ્યા હતા, પરંતુ તેમને નાણાકીય અને અંગત મુશ્કેલીઓનો સામનો કરવો પડી રહ્યો હતો. પાર્ટી તરફથી કોઈ યોગ્ય વ્યવસ્થા કે સહાય ન મળતા આખરે તેમણે ભાજપ છોડવાનો નિર્ણય કર્યો.

તેમણે કહ્યું કે રાજકારણમાં કામ કરવા માટે પણ આર્થિક સ્થિરતા જરૂરી છે. પગાર ન મળવાને કારણે પરિવારનું ગુજરાન ચલાવવું મુશ્કેલ બની રહ્યું હતું. આ સાથે તેમણે કેટલાક અંગત કારણોનો પણ ઉલ્લેખ કર્યો હતો.

શહેઝાદ પૂનાવાલા છેલ્લા ઘણા વર્ષોથી ભાજપના મીડિયા પેનલ અને પ્રવક્તા તરીકે સક્રિય હતા. તેઓ ટીવી ડિબેટમાં પાર્ટીનો પક્ષ મજબૂતાઈથી રજૂ કરવા માટે જાણીતા હતા. તેમના અચાનક રાજીનામાથી ભાજપના આંતરિક વર્તુળોમાં અને રાજકીય ક્ષેત્રે ચર્ચાનો દોર શરૂ થયો છે.

હાલમાં શહેઝાદ પૂનાવાલા ભવિષ્યમાં કઈ રાજકીય દિશા અપનાવશે તે અંગે કોઈ સ્પષ્ટતા કરી નથી. પરંતુ તેમના આ નિવેદન બાદ પાર્ટીમાં કાર્યકરોને મળતી સુવિધાઓ અને આર્થિક મદદના મુદ્દે પણ ચર્ચા શરૂ થઈ છે.

ભાજપ તરફથી હજુ સુધી આ રાજીનામા અંગે કોઈ સત્તાવાર પ્રતિક્રિયા સામે આવી નથી.