મુંબઈ, તા.૧૮: પશ્ચિમ બંગાળના મુર્શિદાબાદ જિલ્લાના બેલડાંગા ગામમાં રહેતા ૧૫ વર્ષીય કિશોર ઇકબાલની વેદનાભરી અને આઘાતજનક કહાનીએ સમગ્ર દેશનું ધ્યાન ખેંચ્યું છે. એક અત્યંત દુર્લભ અને રહસ્યમય શારીરિક સ્થિતિથી પીડાતા ઇકબાલને પાણીમાંથી બહાર નીકળતાં જ આખા શરીરમાં બળતરા થતી હોવાથી તે દિવસ-રાત તળાવના પાણીમાં જ પડ્યો રહેવા મજબૂર બન્યો હતો. સોશિયલ મીડિયા પર તેનો આ કરુણ વિડીયો વાયરલ થતાં જ લાખો લોકોના કાળજા કંપી ઊઠ્યા હતા.

આ કરુણ સ્થિતિની જાણ થતાં જ રિલાયન્સ ઇન્ડસ્ટ્રીઝના એક્ઝિક્યુટિવ ડિરેક્ટર અનંત અંબાણીએ ત્વરિત અને સંવેદનશીલ પહેલ કરી હતી. તેમની અંગત સૂચના અને માર્ગદર્શન હેઠળ ઇકબાલને ગંભીર સ્થિતિમાંથી ઉગારવા માટે તાત્કાલિક વિશેષ એરએમ્બ્યુલન્સ મારફતે એરલિફ્ટ કરીને મુંબઈ લાવવામાં આવ્યો છે. અત્યંત નબળી આર્થિક સ્થિતિ ધરાવતા ઇકબાલના પરિવાર માટે આ મદદ એક દેવદૂત સમાન સાબિત થઈ છે.

સર એચ.એન. રિલાયન્સ ફાઉન્ડેશન હોસ્પિટલમાં સુપર-સ્પેશિયાલિસ્ટ સારવાર:
મુંબઈ લેન્ડ થતાં જ ઇકબાલને દેશની અતિઆધુનિક સર એચ.એન. રિલાયન્સ ફાઉન્ડેશન હોસ્પિટલમાં દાખલ કરવામાં આવ્યો છે. અહીં દેશના શ્રેષ્ઠ તબીબો, ત્વચારોગ વિજ્ઞાનીઓ અને સુપર-સ્પેશિયાલિસ્ટ્સની વિશેષ ટુકડી તેની આ અજાણી બીમારીનું સચોટ નિદાન કરવા માટે વિવિધ જટિલ તબીબી પરીક્ષણો (Medical Tests) હાથ ધરી રહી છે.

તળાવમાં જ ભોજન લેવા મજબૂર બન્યો હતો બાળક:
વાયરલ વિડીયોમાં ઇકબાલ તળાવના પાણીમાં ઊંડે સુધી બેસીને ભોજન લેતો જોવા મળ્યો હતો, જેણે તબીબી જગતમાં પણ ભારે આશ્ચર્ય સર્જ્યું હતું. સતત પાણીમાં રહેવાના કારણે ત્વચામાં અન્ય ચેપ (Infections) અને સ્વાસ્થ્ય જોખમો ઊભા થવાની તબીબોએ ચેતવણી આપી હતી. હવે મુંબઈના નિષ્ણાત ડોક્ટરોની દેખરેખ હેઠળ આ દુર્લભ શારીરિક સ્થિતિનું ચોક્કસ કારણ શોધીને તેને સામાન્ય જીવન તરફ પાછા લાવવા માટે ભગીરથ પ્રયાસો શરૂ કરવામાં આવ્યા છે.