ઇસ્લામાબાદ, તા.૧૮: પાકિસ્તાનના પૂર્વ વડાપ્રધાન અને પીટીઆઈ (PTI) ના વડા ઇમરાન ખાનની કથળતી જતી તબિયતને લઈને પાકિસ્તાનના રાજકારણમાં ભારે હોબાળો મચી ગયો છે. અદિયાલા જેલમાં બંધ ૭૩ વર્ષીય ઇમરાન ખાનના સ્વાસ્થ્ય અંગેની ગંભીર સ્થિતિને ધ્યાનમાં રાખીને પાકિસ્તાનની સુપ્રીમ કોર્ટે મંગળવારે મોટો ચુકાદો આપ્યો છે. અદાલતે જેલ પ્રશાસનને આદેશ આપ્યો છે કે ઇમરાન ખાનને તાત્કાલિક ધોરણે ઇસ્લામાબાદની શિફા ઇન્ટરનેશનલ હોસ્પિટલમાં ખસેડવામાં આવે અને તેમની સચોટ સારવાર માટે ઉચ્ચ સ્તરીય મેડિકલ બોર્ડની રચના કરવામાં આવે.

જસ્ટિસ શાહિદ વાહીદની આગેવાની હેઠળની ત્રણ જજની ખંડપીઠે (જેમાં જસ્ટિસ નઈમ અખ્તર અફઘાન અને જસ્ટિસ ઇશ્તિયાક ઇબ્રાહિમ સામેલ હતા) ઇમરાન ખાનની તબીબી સારવાર અને પરિવાર સાથેની મુલાકાતો અંગેની અરજીઓ પર આ સુનાવણી હાથ ધરી હતી. અદાલતે અદિયાલા જેલ સત્તાવાળાઓ પાસેથી ખાનના તમામ મેડિકલ રેકોર્ડ્સ તુરંત રજૂ કરવા આદેશ આપ્યો હતો. જેલ તબીબી રિપોર્ટમાં ખાનના પલ્સ રેટ અને હૃદયની સ્થિતિ અંગે ભારે ચિંતા વ્યક્ત કરવામાં આવી હતી અને તેમની તાત્કાલિક એન્જિયોગ્રાફી કરવાની ભલામણ કરાઈ હતી.

લોહીના ગંઠાવા (Blood Clots) ની આશંકા અને ખાનગી ડોક્ટરોની માંગ:
ઇમરાન ખાનની પાર્ટી પીટીઆઈ (PTI) એ આશંકા વ્યક્ત કરી હતી કે જેલમાં યોગ્ય સારવારના અભાવે ખાનના શરીરમાં લોહીના ગંઠાવા (બ્લડ ક્લોટ્સ) બની રહ્યા હોઈ શકે છે. આથી તેમણે પોતાના ખાનગી ડોક્ટરોની હાજરીમાં તપાસ કરવાની સુપ્રીમ કોર્ટને અપીલ કરી હતી. જોકે, સુપ્રીમ કોર્ટે પીટીઆઈ ને આગ્રહ કર્યો હતો કે પૂર્વ વડાપ્રધાનના સ્વાસ્થ્ય અને તબીબી સ્થિતિનું રાજકીયકરણ ન કરવામાં આવે અને તેને માત્ર એક આરોગ્ય વિષયક મુદ્દા તરીકે જ જોવામાં આવે.

પરિવાર અને પુત્રો સાથે મુલાકાત એ મૌલિક અધિકાર:
સુપ્રીમ કોર્ટે માનવતાવાદી અભિગમ અપનાવતા સ્પષ્ટ કર્યું હતું કે ઇમરાન ખાન અને તેમની બહેનો તથા પુત્રો વચ્ચેની મુલાકાત અને ફોન પર વાતચીત તેમનો બંધારણીય અને મૂળભૂત અધિકાર છે. અદાલતે છેલ્લા ત્રણ વર્ષમાં તેમની મુલાકાતો અને ફોન કોલ્સની તમામ વિગતો પણ માંગી છે. ઓગસ્ટ ૨૦૨૩ થી જેલમાં બંધ ઇમરાન ખાન પર અનેક કાનૂની કેસો ચાલી રહ્યા છે, જેને તેઓ અને તેમની પાર્ટી રાજકીય રીતે પ્રેરિત ગણાવી રહ્યા છે.