મુંબઈ, તા.૧૮: વૈશ્વિક મંચ પર વધી રહેલી રાજકીય અનિશ્ચિતતા અને કાચા તેલના ભડકે બળતા ભાવની સીધી અસર ભારતીય શેરબજાર પર જોવા મળી રહી છે. મંગળવારે ટ્રેડિંગના અંતે ભારતીય શેરબજારે પોતાના ઘટાડાની હેટ્રિક લંબાવી હતી. પશ્ચિમ એશિયામાં સર્જાયેલા યુદ્ધના વાદળો, ક્રૂડ ઓઇલના આસમાને પહોંચેલા ભાવ અને અમેરિકી બોન્ડ યીલ્ડમાં થયેલા વધારાને કારણે રોકાણકારોમાં ભારે ગભરાટનો માહોલ જોવા મળ્યો હતો, જેના પરિણામે દિવસના અંતે બેન્ચમાર્ક ઇન્ડેક્સ લાલ નિશાનમાં બંધ થયા હતા.

મંગળવારે BSE સેન્સેક્સ ૪૯૨.૭૦ પોઈન્ટ અથવા ૦.૬૩ ટકાના મોટા ઘટાડા સાથે ૭૭,૨૩૫.૪૬ ની સપાટી પર બંધ રહ્યો હતો, જે તેનો સતત ત્રીજો ઘટાડો દર્શાવે છે. ટ્રેડિંગ દરમિયાન એક સમયે સેન્સેક્સ ૭૭,૨૩૪.૩૬ ની ઇન્ટ્રાડે નીચલી સપાટીએ પહોંચી ગયો હતો. બીજી તરફ, NSE નિફ્ટી ૧૩૨.૭૫ પોઈન્ટ (૦.૫૫ ટકા) નીચા ખાબકીને ૨૪,૧૫૪.૯૦ ના સ્તરે બંધ થયો હતો. આ સાથે જ નિફ્ટી સતત છઠ્ઠા ટ્રેડિંગ સત્રમાં રેડ ઝોનમાં બંધ રહ્યો છે.

બ્રેન્ટ ક્રૂડ $૯૧ ને પાર, ફુગાવાનો નવો ખતરો:

ઇન્ટરનેશનલ માર્કેટમાં બ્રેન્ટ ક્રૂડનો ભાવ ૦.૧૭ ટકા વધીને પ્રતિ બેરલ $૯૧.૦૨ ની ચિંતાજનક ટોચે પહોંચી ગયો છે. પોતાની ઉર્જા જરૂરિયાતો માટે આયાત પર નિર્ભર ભારતીય અર્થતંત્ર માટે આ સ્થિતિ અત્યંત ગંભીર છે. યુએસ અને ઈરાન વચ્ચે કામચલાઉ યુદ્ધવિરામનો અંત આવતાં મધ્ય પૂર્વમાં સૈન્ય તણાવ વધવાની ચિંતા વધી છે. કચાસ તેલના ઊંચા ભાવથી દેશમાં મોંઘવારી (ફુગાવો) વધવાનો, રૂપિયો નબળો પડવાનો અને કોર્પોરેટ કંપનીઓની પડતર કિંમત વધવાનો મોટો ભય ઊભો થયો છે.

IT શેરોમાં ભારે ધોવાણ અને વિદેશી રોકાણકારોનું પલાયન:

અમેરિકામાં વ્યાજદરો લાંબા સમય સુધી ઊંચા રહેવાની શક્યતાઓને પગલે ગ્લોબલ આઈટી સ્પેન્ડિંગ ઘટવાની આશંકાએ ભારતીય આઈટી કંપનીઓમાં ભારે વેચવાલી જોવા મળી હતી. ઇન્ફોસિસ, ટીસીએસ, એચસીએલ ટેક, એશિયન પેઇન્ટ્સ અને એચયુએલ જેવા હેવીવેઇટ શેરોમાં મોટો ઘટાડો નોંધાયો હતો. એક્સચેન્જ ડેટા મુજબ, વિદેશી સંસ્થાકીય રોકાણકારો (FIIs) એ સોમવારે જ ₹૨,૫૩૫.૧૦ કરોડના શેર વેચી માર્યા હતા. જાપાનનો નિક્કી અને કોરિયાનો કોસ્પી પણ ઘટાડા સાથે બંધ રહ્યા હતા.