પુણે, તા.૧૮: પોતાના જ પરિવાર પાસેથી લાખો રૂપિયા પડાવવા માટે લોકો કેવા કેવા હથકંડા અપનાવે છે તેનો એક ચોંકાવનારો કિસ્સો મહારાષ્ટ્રના પુણે શહેરમાંથી સામે આવ્યો છે. ઉત્તર પ્રદેશના બાંદા જિલ્લાના ૧૯ વર્ષીય યુવકે આર્થિક મુશ્કેલીઓમાંથી બહાર આવવા માટે પોતાના જ અપહરણનું સનસનાટીભર્યું કાવતરું રચ્યું હતું. તેણે પરિવારજનોને ડરાવવા માટે પોતાનો રડતો અને દયાની ભીખ માંગતો વીડિયો બનાવીને મોકલ્યો હતો અને ₹૫ લાખની ખંડણી માંગી હતી. જોકે, પુણે પોલીસની સજાગતાને કારણે આ સમગ્ર ડ્રામાનો પર્દાફાશ થઈ ગયો છે.

રડતો વીડિયો બનાવી ભાઈ પાસેથી ₹૫ લાખની માંગણી કરી:

પોલીસ સુત્રોના જણાવ્યા અનુસાર, આરોપી યુવકની ઓળખ ઉત્તર પ્રદેશના બાંદા જિલ્લાના બાબેરુ તાલુકાના જલાલપુર ગામના રહેવાસી ઓમ પ્રકાશ ગૌરીશંકર તરીકે થઈ છે. આર્થિક ભીંસમાં મુકાયેલા ઓમ પ્રકાશે પોતાના મોટા ભાઈ પાસેથી પૈસા પડાવવા માટે અપહરણનો ખેલ રચ્યો હતો. તેણે પરિવારને મેસેજ અને વીડિયો મોકલીને દાવો કર્યો હતો કે અજાણ્યા અપહરણકારોએ તેને બંધક બનાવી લીધો છે અને જો ₹૫ લાખ ચૂકવવામાં નહીં આવે તો તેઓ તેની હત્યા કરી નાખશે.

પુણેની લોજમાંથી સુરક્ષિત મળી આવ્યો:

ગભરાઈ ગયેલા પરિવારે તાત્કાલિક ઉત્તર પ્રદેશ પોલીસનો સંપર્ક કર્યો હતો. યુપી પોલીસે બનાવની ગંભીરતા જોઈ પુણે પોલીસની મદદ માંગી હતી. પુણે પોલીસે તાત્કાલિક સાયબર સેલની મદદથી ઓમ પ્રકાશના ફોનનું લોકેશન ટ્રેસ કર્યું હતું, જે પુણેના ખડકી વિસ્તારમાં બતાવતું હતું. પોલીસની ટીમ જ્યારે નિર્દિષ્ટ લોજ પર પહોંચી અને રૂમ ખોલ્યો ત્યારે અંદર કોઈ અપહરણકારો નહોતા પરંતુ ઓમ પ્રકાશ આરામથી એકલો બેઠો હતો.

પોલીસ સામે કબૂલાત અને કાનૂની કાર્યવાહી:

પોલીસની આકરી પૂછપરછમાં ૧૯ વર્ષીય ઓમ પ્રકાશે કબૂલ્યું હતું કે તેણે જ પૈસા મેળવવા માટે આ સમગ્ર કાવતરું રચ્યું હતું. રવિવારે ઘડાયેલા આ ડ્રામાનો સોમવારે વહેલી સવારે જ અંત આવી ગયો હતો. પુણે પોલીસે યુવકને કસ્ટડીમાં લઈને તેની સામે છેતરપિંડી અને ગુનાહિત ષડયંત્ર હેઠળ આગળની કાનૂની કાર્યવાહી હાથ ધરી છે.