નવી દિલ્હી : ભારત સરકારના યુવા અને રમતગમત મંત્રાલય દ્વારા વર્ષ ૨૦૨૫ માટેના પ્રતિષ્ઠિત 'રાષ્ટ્રીય રમતગમત પુરસ્કારો' ની અધિકૃત જાહેરાત કરી દેવામાં આવી છે. શરૂઆતમાં પસંદગી સમિતિ દ્વારા મોકલવામાં આવેલી ૨૪ નામોની યાદીમાંથી મંત્રાલયે સંપૂર્ણ ચકાસણી બાદ માત્ર ૧૭ લાયક રમતવીરોના નામ પર જ આખરી મહોર મારી છે. નોંધનીય છે કે આ વર્ષે દેશના સર્વોચ્ચ રમતગમત સન્માન 'મેજર ધ્યાનચંદ ખેલ રત્ન પુરસ્કાર' માટે કોઈ પણ ખેલાડીની પસંદગી કરવામાં આવી નથી. વર્ષ ૨૦૧૪ પછી આ પ્રથમ ઘટના છે જ્યારે ખેલ રત્ન એવોર્ડ ખાલી રહ્યો હોય.

આ દેશી રમતના તારલાઓ મેળવશે 'અર્જુન એવોર્ડ':

આ વર્ષે અર્જુન પુરસ્કાર મેળવનારા ૧૭ દિગ્ગજ ખેલાડીઓમાં વર્લ્ડ કપ વિજેતા ચેસ ગ્રાન્ડમાસ્ટર દિવ્યા દેશમુખ અને વિદિત ગુજરાતી, ડેકેથલીટ અને હાઇ જમ્પર તેજસ્વિન શંકર, બેડમિન્ટન સ્ટાર ગાયત્રી ગોપીચંદ અને તેની વિમેન્સ ડબલ્સ પાર્ટનર ટ્રીસા જોલીનો સમાવેશ થાય છે. આ ઉપરાંત કોમનવેલ્થ ગેમ્સના સિલ્વર મેડલ વિજેતા બોક્સર નરેન્દ્ર બેરવાલ અને બધિર (ડેફ) શૂટર ધનુષ શ્રીકાંતને પણ આ બહુમાન મળશે. જોકે, ક્રિકેટ ચાહકો માટે નિરાશાજનક વાત એ છે કે સતત બીજા વર્ષે કોઈ પણ ભારતીય ક્રિકેટરનું નામ આ યાદીમાં સ્થાન પામી શક્યું નથી.

એવોર્ડની ગરિમા જાળવવા કડક પુનઃમૂલ્યાંકન:

પીટીઆઈના અહેવાલ મુજબ, આ વખતે રાષ્ટ્રીય રમતગમત પુરસ્કારોની જાહેરાતમાં ઘણો વિલંબ થયો હતો. રમતગમત મંત્રાલયે સ્પષ્ટ કર્યું હતું કે પુરસ્કારોની અખંડિતતા અને ગરિમા જાળવી રાખવા માટે દરેક નામાંકનનું કડક પુનઃમૂલ્યાંકન કરવામાં આવ્યું હતું, જેથી માત્ર વાસ્તવિક અને ઉત્કૃષ્ટ પ્રદર્શન કરનારા ખેલાડીઓને જ સન્માનિત કરી શકાય.

અર્જુન એવોર્ડ વિજેતાઓને શું મળે છે?

અર્જુન પુરસ્કાર એ ભારતનો બીજો સૌથી મોટો રમતગમત પુરસ્કાર છે. આ એવોર્ડ જીતનાર ખેલાડીને રૂ. ૧૫ લાખની રોકડ રકમ, અર્જુનની કાંસ્યની પ્રતિમા, એક પ્રશસ્તિપત્ર (સ્ક્રોલ) અને ખાસ ઔપચારિક પોશાક (સેરેમોનિયલ ડ્રેસ) એનાયત કરવામાં આવે છે. રાષ્ટ્રપતિ ભવન ખાતે આયોજિત ભવ્ય સમારોહમાં દેશના રાષ્ટ્રપતિના હસ્તે તમામ વિજેતાઓને આ એવોર્ડથી નવાજવામાં આવશે.