ખાર્કિવ : યુક્રેનના ઉત્તર-પૂર્વીય ખાર્કિવ પ્રદેશમાં રશિયન સૈન્ય દ્વારા કરવામાં આવેલા વિનાશક મિસાઇલ હુમલામાં ઓછામાં ઓછા ૧૦ લોકોના કરૂણ મોત થયા છે અને અન્ય ૧૭ લોકો ગંભીર રીતે ઘાયલ થયા છે. આ હુમલો પેચેનિહી ગામના મધ્ય ભાગમાં આવેલા ગીચ બજાર વિસ્તારમાં થયો હતો, જ્યાં સ્થાનિક કાફે, દુકાનો, રહેણાંક ઇમારતો અને એક પોસ્ટ ઓફિસ આવેલી છે. હુમલાને કારણે સમગ્ર વિસ્તારમાં ભારે વિનાશ સર્જાયો છે અને અનેક વાહનો બળીને ખાખ થઈ ગયા છે.

વ્યસ્ત આંતરછેદ પર ક્રુઝ મિસાઇલોથી પ્રહાર:

યુક્રેનના પ્રોસીક્યુટર જનરલ ઓફિસની પ્રાથમિક વિગતો મુજબ, રશિયાએ આ હુમલામાં બે નાના કદની કસ્ટમાઇઝ્ડ ક્રુઝ મિસાઇલોનો ઉપયોગ કર્યો હતો. સવારના સમયે જ્યારે સામાન્ય નાગરિકો દૈનિક કામકાજ માટે નીકળ્યા હતા, ત્યારે મિસાઇલો સીધી ગામના મધ્ય વિસ્તારમાં આવીને ત્રાટકી હતી. જેના કારણે ૧૦ ખાનગી ઇમારતો, એક કાફે, પોસ્ટ ઓફિસ અને સાતથી વધુ વાહનો સંપૂર્ણપણે નાશ પામ્યા હતા.

ઝેલેન્સ્કીનો આકરો પ્રહાર અને જવાબી કાર્યવાહીની ધમકી:

યુક્રેનના રાષ્ટ્રપતિ વોલોડીમીર ઝેલેન્સ્કીએ સોશિયલ મીડિયા પ્લેટફોર્મ X પર આ ભયાનક હુમલાના ફોટા શેર કરતાં રશિયા સામે આકરો રોષ ઠાલવ્યો હતો. તેમણે લખ્યું કે, સામાન્ય નાગરિકો અને નિર્દોષ લોકોને નિશાન બનાવીને રશિયા પોતાની કાયરતા છતી કરી રહ્યું છે. ઝેલેન્સ્કીએ સિંહગર્જના કરતા કહ્યું કે, યુક્રેન આ નિર્દય હુમલાને ક્યારેય નહીં ભૂલે અને રશિયન દળોને આનો યોગ્ય અને આકરો જવાબ ચોક્કસપણે આપવામાં આવશે.

ઘટનાસ્થળે રાહત અને બચાવ કામગીરી:

ખાર્કિવ પ્રદેશના ગવર્નર ઓલેહ સિનિહુબોવે જણાવ્યું હતું કે હુમલા બાદ તુરંત જ ઈમરજન્સી અને રેસ્ક્યૂ ટીમો ઘટનાસ્થળે પહોંચી ગઈ હતી. કાટમાળ નીચે દબાયેલા લોકોને બહાર કાઢીને સારવાર અર્થે હોસ્પિટલ ખસેડવામાં આવ્યા છે. બચાવકર્તાઓએ ક્ષતિગ્રસ્ત ઇમારતોમાં લાગેલી આગ પર કાબૂ મેળવ્યો હતો. જોકે, આ ભયાનક મિસાઇલ હુમલા અંગે રશિયા તરફથી હજુ સુધી કોઈ સત્તાવાર નિવેદન બહાર પાડવામાં આવ્યું નથી.