નવી દિલ્હી : નવી દિલ્હી ખાતે આયોજિત ૧૨મી BRICS (બ્રિક્સ) પર્યાવરણ મંત્રીઓની બેઠક દરમિયાન બ્રિક્સ એનવાયર્નમેન્ટ વર્કિંગ ગ્રૂપ દ્વારા તૈયાર કરવામાં આવેલા ૪ મહત્વપૂર્ણ જ્ઞાન સંગ્રહ (નોલેજ કમ્પાઈલેશન) નું વિમોચન કરવામાં આવ્યું છે. ભારતની આગેવાની હેઠળ કેન્દ્રીય પર્યાવરણ મંત્રી ભૂપેન્દ્ર યાદવ અને બ્રિક્સ સભ્ય દેશોના પ્રતિનિધિ મંડળોના વડાઓએ સંયુક્ત રીતે આ વિશેષ દસ્તાવેજો લોન્ચ કર્યા હતા, જે સભ્ય દેશોમાં ચાલી રહેલી પર્યાવરણીય નવીનતાઓ અને અગ્રણી પ્રથાઓને વિશ્વ સમક્ષ રજૂ કરે છે.

પર્યાવરણ સંરક્ષણ અને સુસ્થિત જીવનશૈલી પર ભાર:

જાહેર કરાયેલા પ્રથમ બે સંગ્રહમાં રાષ્ટ્રીય અનુભવો, ટકાઉ જીવનશૈલીને પ્રોત્સાહન આપવા માટેની સફળતાની વાર્તાઓ અને સંકલિત અગ્નિ વ્યવસ્થાપન (ઈન્ટિગ્રેટેડ ફાયર મેનેજમેન્ટ) માટેની નવીન પદ્ધતિઓનો સમાવેશ થાય છે. પ્રથમ દસ્તાવેજમાં એ બાબત પર પ્રકાશ પાડવામાં આવ્યો છે કે કેવી રીતે બ્રિક્સ દેશો નીતિગત પરિવર્તન, વર્તણૂક પરિવર્તન અને પર્યાવરણીય શિક્ષણ દ્વારા પર્યાવરણ અનુકૂળ જીવનશૈલીને વ્યવહારુ અમલમાં મૂકી રહ્યા છે.

જંગલની આગ અને જમીન ધોવાણ રોકવા માટે સંયુક્ત વ્યુહરચના:

બીજો સંગ્રહ જંગલોની આગ અટકાવવા, અગાઉથી ચેતવણી આપવાની સિસ્ટમ અને આગ લાગ્યા બાદ તાત્કાલિક રાહત-બચાવ કાર્યો માટેની એકીકૃત નીતિ પર ધ્યાન કેન્દ્રિત કરે છે. જ્યારે ત્રીજો દસ્તાવેજ જમીનનું ધોવાણ, રણનીકરણ, જૈવવિવિધતાનું નુકસાન અને વાતાવરણમાં થઈ રહેલા ગંભીર આબોહવા પરિવર્તન જેવા પરસ્પર જોડાયેલા પડકારો સામે લડવા માટે બ્રિક્સ દેશોના અનુભવો અને નીતિગત અભિગમોને એકત્રિત કરે છે.

સર્ક્યુલર ઈકોનોમી અને ગ્રીન ટેકનોલોજી:

ચોથા દસ્તાવેજમાં 'સર્ક્યુલર અને રિસોર્સ-એફિશિયન્ટ ઈકોનોમી' તરફ આગળ વધવા માટે સભ્ય દેશોના અનુભવો અને સંસ્થાકીય મોડેલોનો સમાવેશ કરાયો છે. સરકારી અધિકારીઓએ જણાવ્યું કે આ જ્ઞાન સંગ્રહ ડિજિટલ ટ્રેસેબિલિટી સોલ્યુશન્સ, ટેકનિકલ ક્ષમતા નિર્માણ અને સંસાધન-કાર્યક્ષમ વ્યાપારી મોડેલ્સ વિકસાવીને બ્રિક્સ દેશો વચ્ચેના પર્યાવરણીય સહયોગને નવી ઊંચાઈએ લઈ જશે.