નવી દિલ્હી: સુપ્રિમ કોર્ટ બાર એસોસિએશન (SCBA) ની વર્ષ ૨૦૨૬-૨૭ ની ચૂંટણીનું પરિણામ જાહેર થયું છે, જેમાં સીનિયર એડવોકેટ પ્રદીપ રાય નવા પ્રમુખ તરીકે ચૂંટાઈ આવ્યા છે. તેઓ વર્ષ ૨૦૨૫-૨૬ માટે SCBA ના પ્રમુખ તરીકે સેવા આપી રહેલા સીનિયર એડવોકેટ વિકાસ સિંહ પાસેથી હોદ્દાનો ચાર્જ સંભાળશે. આ ચૂંટણીમાં સીનિયર એડવોકેટ રાહુલ કૌશિક ઉપપ્રમુખ અને એડવોકેટ પ્રજ્ઞા બઘેલ સેક્રેટરી (મંત્રી) તરીકે વિજેતા બન્યા છે. આ ઉપરાંત એડવોકેટ મનીષ દુબે જોઈન્ટ સેક્રેટરી અને એડવોકેટ દીપક કનસલ ટ્રેઝરર (ખજાનચી) પદે ચૂંટાયા છે.

૮૨ ટકા મતદાન સાથે પ્રદીપ રાયને મળ્યા ૮૨૨ મત:

પ્રારંભિક અંદાજો મુજબ આ ચૂંટણીમાં આશરે ૮૨ ટકા મતદાન નોંધાયું હતું અને કુલ ૨૭૯૪ જેટલા મત પડ્યા હતા. પ્રમુખ પદની રેસમાં પ્રદીપ રાયે ૮૨૨ મત મેળવીને પોતાના નજીકના હરીફ સીનિયર એડવોકેટ અનુપમ લાલ દાસને મોટા તફાવતથી હરાવ્યા હતા, જેમને ૪૫૧ મત મળ્યા હતા. પ્રમુખ પદના અન્ય ઉમેદવારોમાં સીનિયર એડવોકેટ આદિશ અગ્રવાલને ૪૧૨ મત, ગૌરવ ભાટિયાને ૩૭૦ મત, સુકુમાર પટ જોશીને ૨૬૯ મત, સિદ્ધાર્થ મૃદુલને ૨૧૭ મત અને મહાલક્ષ્મી પવાનીને ૧૨૮ મત પ્રાપ્ત થયા હતા.

અગાઉ પણ બાર એસોસિએશનના હોદ્દા પર ફરજ બજાવી ચૂક્યા છે પ્રદીપ રાય:

નોંધનીય છે કે, પ્રદીપ રાયે ગત વર્ષે પણ આદિશ અગ્રવાલ સાથે પ્રમુખ પદ માટે ચૂંટણી લડી હતી, જેમાં બંનેનો વિકાસ સિંહ સામે પરાજય થયો હતો. વિકાસ સિંહ અગાઉ સીનિયર એડવોકેટ કપિલ સિબ્બલ SCBA ના પ્રમુખ હતા. આ ઉપરાંત પ્રદીપ રાય વર્ષ ૨૦૨૧–૨૨ અને ૨૦૨૨–૨૩ ના કાર્યકાળ દરમિયાન સુપ્રિમ કોર્ટ બાર એસોસિએશનના ઉપપ્રમુખ તરીકે પણ પોતાની સેવાઓ આપી ચૂક્યા છે.

વકીલો માટે ૫૦ લાખ સુધીનું મેડિકલ કવર અને શિષ્યવૃત્તિના આપ્યા હતા વચનો:

ચૂંટણી પહેલાં યોજાયેલી પ્રેસિડેન્શિયલ ડિબેટ (પ્રમુખ પદની ચર્ચા) માં પ્રદીપ રાયે સુપ્રિમ કોર્ટમાં સિક્વન્સિંગ સિસ્ટમ નાબૂદ કરવાનું સમર્થન કર્યું હતું અને વકીલોના કલ્યાણ માટેના પગલાં લેવાની કટિબદ્ધતા દર્શાવી હતી. તેમણે SCBA સભ્યોના બાળકો માટે મેરિટ-આધારિત શિષ્યવૃત્તિ અને વકીલો માટે રૂ. ૫૦ લાખ સુધીનું મેડિકલ સિક્યુરિટી કવર પૂરું પાડવાનું વચન આપ્યું હતું.

સુપ્રિમ કોર્ટે એપ્રિલ મહિનામાં આ વર્ષની ઈલેક્શન કમિટીને ૫ ઓગસ્ટ સુધીમાં પરિણામોની જાહેરાત સહિતની સમગ્ર ચૂંટણી પ્રક્રિયા પૂર્ણ કરવા નિર્દેશ આપ્યો હતો. સર્વોચ્ચ અદાલતે ચૂંટણી સુધારા દાખલ કરતો આદેશ આપ્યો હતો, પરંતુ બાદમાં તેમાં સુધારો કરીને સુધારાઓને વર્ષ ૨૦૨૭ સુધી મુલતવી રાખ્યા હતા અને ૧૮ ઓગસ્ટની આસપાસ ચૂંટણી યોજવાનો આદેશ આપ્યો હતો.