નવી દિલ્હી (ન્યૂઝફર્સ્ટ) : કેન્દ્ર સરકારે નાણાકીય હેરાફેરી અને કરચોરી સામે મોટી કાર્યવાહી કરતા વિદેશી નાણાં ટ્રાન્સફર (રેમિટન્સ) મામલે એક મોટો લૂપહોલ (ખામી) શોધી કાઢ્યો છે. દેશમાં અચાનક અસ્તિત્વમાં આવેલી ૬,૪૨૨ નવી એન્ટિટીઝ (સંસ્થાઓ/કંપનીઓ) દ્વારા વિદેશમાં રૂ. ૧.૨૯ લાખ કરોડની અધધ રકમ મોકલવામાં આવી હોવાનું સામે આવ્યું છે. આ મામલે આયકર અને સંબંધિત ટેક્સ વિભાગે તાત્કાલિક એક્શન લેતા ૩૯૪ પેઢીઓ સામે કડક કાયદેસરની કાર્યવાહી શરૂ કરી દીધી છે.

સિંગાપુર સહિતના પંચમુખી દેશોમાં ૭૨.૩ ટકા રકમ ટ્રાન્સફર કરાઈ:

સરકારી આંકડાઓ મુજબ, વિદેશ મોકલવામાં આવેલી કુલ રકમના ૭૨.૩ ટકા નાણાં માત્ર પાંચ દેશો—સિંગાપોર, યુ.એ.ઈ., હોંગકોંગ, મોરિશિયસ અને ચીનમાં જમા થયા છે. જેમાં સિંગાપોર રૂ. ૪૧,૮૮૫ કરોડના રેમિટન્સ સાથે સૌથી ટોચનું ડેસ્ટિનેશન બનીને ઉભરી આવ્યું છે. આ ઉપરાંત, યુનાઇટેડ આરબ અમીરાત (UAE) માં રૂ. ૧૮,૩૩૧ કરોડ અને હોંગકોંગમાં રૂ. ૧૮,૦૬૪ કરોડ ટ્રાન્સફર કરવામાં આવ્યા છે.

ચાલુ નાણાકીય વર્ષના પ્રથમ છ મહિનામાં જ મોટો ઉછાળો, દરોડાની તૈયારી:

તપાસ દરમિયાન એ પણ બહાર આવ્યું છે કે, વિદેશી સરનામું ધરાવતી ૮૩ સંસ્થાઓ દ્વારા એકલી જ રૂ. ૩૬,૧૭૫ કરોડની માતબર રકમ વિદેશ ભેજી દેવામાં આવી છે. નાણાકીય વર્ષ ૨૦૨૫-૨૬ ના પ્રથમ છ માસિક ગાળા (H1 FY26) માં જ રૂ. ૪૩,૦૪૮ કરોડ વિદેશ મોકલી દેવાયા છે, જે વિતેલા નાણાકીય વર્ષ ૨૦૨૪-૨૫ (FY25) ના સમગ્ર વર્ષ દરમિયાન મોકલાયેલી કુલ રકમના ૭૮ ટકા જેટલી થવા જાય છે.

આટલી મોટી રકમ ટૂંક સમયમાં જ બહાર જતી રહેતા તપાસ એજન્સીઓ સતર્ક બની છે. હાલ અનેક શકમંદ કંપનીઓ, શેલ સંસ્થાઓ અને વ્યક્તિઓ ટેક્સ વિભાગના રડારમાં છે અને ટૂંક સમયમાં જ સમગ્ર દેશમાં વ્યાપક દરોડા પાડવામાં આવે તેવી પ્રબળ શક્યતાઓ સેવાઈ રહી છે.