નવી દિલ્હી, તા.19: ભારતીય વાયુસેના (IAF) ના સાહસિક અને ગોપનીય 'ઓપરેશન સિંદૂર' ને લઈને એક અત્યંત ગર્વભાવ ઉપજાવનારો ખુલાસો સામે આવ્યો છે. પાકિસ્તાનના મુરિદકે સ્થિત આતંકવાદી સંગઠન લશ્કર-એ-તૈયબા (LeT) ના મુખ્યાલયને ધ્વસ્ત કરનારા ભારતીય સ્ટ્રાઇક પેકેજમાં ભારતીય વાયુસેનાની એક મહિલા ફાઇટર પાઇલટ પણ સક્રિયપણે સામેલ હતી.

પ્રાપ્ત અહેવાલો અનુસાર, આ સજ્જડ ઓપરેશન દરમિયાન વાયુસેનાની એક મહિલા ફ્લાઇટ લેફ્ટનન્ટે અદ્યતન Su-30MKI ફાઇટર જેટ ઉડાડીને મિશનને અંજામ આપ્યો હતો. આ ઘાતક વિમાન રેમ્પેજ અને બ્રહ્મોસ જેવી હવાથી જમીન પર પ્રહાર કરતી અત્યાધુનિક મિસાઇલોથી સજ્જ રહેવા માટે જાણીતું છે. તાજેતરમાં રિલીઝ થયેલી ડિસ્કવરી ચેનલની બે ભાગની ડોક્યુમેન્ટ્રી સિરીઝ "ડિક્લાસિફાઇડ: ઓપરેશન સિંદૂર" માં મહિલા અધિકારીના ફૂટેજ દર્શાવવામાં આવ્યા બાદ આ ઐતિહાસિક બાબત જાહેરમાં આવી છે, જોકે સુરક્ષાના કારણોસર તેમની ઓળખ ગુપ્ત રાખવામાં આવી છે.

અહેવાલો દર્શાવે છે કે આ સમગ્ર ઓપરેશનમાં એક કરતાં વધુ મહિલા ફાઇટર પાઇલટોએ ભાગ લીધો હતો. તેમણે Su-30MKI અને રાફેલ (Rafale) બંને પ્રકારના ફાઇટર વિમાનોમાં પોતાની સેવા આપી હતી. કેટલાક મિશનમાં મહિલા અધિકારીઓએ મુખ્ય પાઇલટ તરીકે તો કેટલાક મિશનમાં વેપન સિસ્ટમ ઓપરેટર (WSO) તરીકે નિર્ણાયક ભૂમિકા ભજવી હતી.

'ઓપરેશન સિંદૂર' ના પ્રથમ જ દિવસે ભારતીય દળોએ દુશ્મનના નવ મહત્વપૂર્ણ લક્ષ્યો પર એકસાથે સચોટ હુમલા કર્યા હતા. જેમાં વાયુસેનાએ મુરિદકેમાં લશ્કર-એ-તૈયબાના હેડક્વાર્ટર અને બહાવલપુરમાં જૈશ-એ-મોહમ્મદના મુખ્યાલયને નિશાન બનાવીને સંપૂર્ણપણે નેસ્તનાબૂદ કરી દીધા હતા, જ્યારે થલસેનાએ અન્ય આતંકી અડ્ડાઓ પર લાંબા અંતરની તોપો અને લોઇટરિંગ મ્યુનિશન (આત્મઘાતી ડ્રોન) નો ઉપયોગ કરીને ભીષણ પ્રહાર કર્યા હતા.