નવી દિલ્હી, તા.૧૯: સમાજવાદી પાર્ટીના પ્રમુખ અને ઉત્તર પ્રદેશના ભૂતપૂર્વ મુખ્યમંત્રી અખિલેશ યાદવે E20 પેટ્રોલના ઉપયોગ મુદ્દે કેન્દ્રની ભાજપ સરકાર પર આકરા પ્રહારો કર્યા છે. મુખ્ય આર્થિક સલાહકાર (CEA) વી. અનંત નાગેશ્વરન દ્વારા વાહનો પર ઉચ્ચ ઇથેનોલ મિશ્રણની નકારાત્મક અસર અંગે વ્યક્ત કરાયેલી ચિંતાઓ અને E10 ઇંધણને સમર્થન આપતા અહેવાલોને ટાંકીને અખિલેશ યાદવે સરકારના વલણ સામે ગંભીર સવાલો ઊભા કર્યા છે.

અખિલેશ યાદવે સોશિયલ મીડિયા પ્લેટફોર્મ 'X' પર એક પોસ્ટ શેર કરીને સરકારને સીધો પ્રશ્ન પૂછ્યો છે કે, "E20 પેટ્રોલ વાહનોને નુકસાન પહોંચાડી રહ્યું છે અને જૂના ટુ-વ્હીલર માટે E10 પેટ્રોલનું વેચાણ ફરી શરૂ થવું જોઈએ. આવી સ્થિતિમાં કોણ સાચું છે: સરકાર કે તેના સલાહકાર?" તેમણે ઉમેર્યું કે એક તરફ સરકાર ઇંધણમાં કોઈ ખામી ન હોવાનો દાવો કરે છે, તો બીજી તરફ તેમના પોતાના જ સલાહકારો વાહનોના એન્જિન પર પડતી વિપરીત અસરો અંગે ચેતવણી આપી રહ્યા છે.

ઇથેનોલ મિશ્રિત E20 ઇંધણને "બેધારી તલવાર" ગણાવતા સમાજવાદી પાર્ટીના નેતાએ કહ્યું કે તે સામાન્ય જનતા પર "બેવડો આર્થિક બોજ" નાખી રહ્યું છે. એક તરફ મોંઘું પેટ્રોલ અને બીજી તરફ વાહનોના પાર્ટ્સ બગાડવાને કારણે વધતો જાળવણી (મેન્ટેનન્સ) ખર્ચ નાગરિકોને પીસી રહ્યો છે. વિવિધ મુદ્દાઓ પર સર્વે કરતી સરકાર E20 થી મુશ્કેલી ભોગવી રહેલા વાહનચાલકોનો પ્રતિસાદ સીધો કેમ મેળવતી નથી, તેવો પ્રશ્ન પણ તેમણે ઉઠાવ્યો હતો.

ઉલ્લેખનીય છે કે, ક્રૂડ ઓઇલની આયાત નિર્ભરતા અને વાહનોનું પ્રદૂષણ ઘટાડવાના હેતુથી સરકારે ૨૦% ઇથેનોલ ધરાવતું E20 પેટ્રોલ દેશભરમાં તબક્કાવાર રજૂ કર્યું છે. જોકે, એપ્રિલ ૨૦૨૬ થી તમામ ફ્યુઅલ પંપો પર E20 ઉપલબ્ધ બન્યા બાદથી જૂના વાહનો (જે ઉચ્ચ ઇથેનોલ મિશ્રણ માટે ડિઝાઇન નથી કરાયા) ધરાવતા વાહનચાલકોમાં એન્જિન પરફોર્મન્સ ઘટવા અને ફ્યુઅલ લાઇનને નુકસાન થવાની ચિંતાઓ સતત વધી રહી છે.