બેંગલુરુ, તા.૧૯: કર્ણાટકના ફૂડ સેફ્ટી એન્ડ ડ્રગ એડમિનિસ્ટ્રેશન (FSDA) અને પોલીસ ટીમે એક સંયુક્ત સપાટો બોલાવીને બેંગલુરુ દક્ષિણ જિલ્લાના બિદાદી નજીક આવેલા એક ભાડાના ફાર્મહાઉસમાંથી ₹૫ કરોડથી વધુની કિંમતનો નકલી દવાઓનો જથ્થો ઝડપી પાડ્યો છે. પ્રાથમિક તપાસ મુજબ, આ કૌભાંડીઓ કેન્સર જેવી ગંભીર બીમારીઓ માટે વપરાતી દવાઓના નકલી રેકેટ સાથે સંકળાયેલા હતા. ફાર્મહાઉસમાંથી વિખ્યાત મલ્ટીનેશનલ ફાર્મા કંપની ફાઇઝર (Pfizer) ના ડુપ્લિકેટ લેબલો, નોચિંગ મશીનો અને કૌશિક ફાર્માસ્યુટિકલ્સના નામના બોગસ બિલ-ઇન્વોઇસ જપ્ત કરવામાં આવ્યા છે.

આ ઘટના અંગે રાજ્યના આરોગ્ય મંત્રી યુ.ટી. ખાડરે ગંભીર નોંધ લેતા જણાવ્યું છે કે, આ એક મોટા આંતરરાજ્ય અને આંતરરાષ્ટ્રીય સ્તરનું રેકેટ હોઈ શકે છે, જેને ધ્યાનમાં રાખીને સરકારે વિશેષ તપાસ ટીમ (SIT) ની રચના કરવાનો આદેશ આપ્યો છે. મળતી માહિતી મુજબ, આ નકલી દવાઓનો જથ્થો હિમાચલ પ્રદેશ, તેલંગાણા અને અન્ય રાજ્યોમાંથી સસ્તા ભાવે મંગાવવામાં આવતો હતો.

FSDA કમિશનર કે. શ્રીનિવાસે ખુલાસો કર્યો હતો કે આ કૌભાંડ કોઈપણ માન્ય ડ્રગ લાયસન્સ વગર ચાલી રહ્યું હતું. કૌભાંડીઓ માત્ર ₹૬૦૦ થી ₹૭૦૦ માં નકલી અને સબ-સ્ટાન્ડર્ડ દવાઓ ખરીદતા હતા અને તેના પર ફાઇઝર સહિતની નામાંકિત બ્રાન્ડ્સના આકર્ષક લેબલો લગાડીને ₹૬,૦૦૦ થી ₹૭,૦૦૦ ના ઊંચા ભાવે બજારમાં વેચતા હતા. વન-વિભાગ અને પોલીસ હવે આ ડુપ્લિકેટ દવાઓ ખરીદનારા રિટેલરો અને દર્દીઓ સુધી પહોંચવા માટે સપ્લાય ચેઇનની ઊંડાણપૂર્વક તપાસ કરી રહી છે.

પોલીસ તપાસમાં બહાર આવ્યું છે કે આ ફાર્મહાઉસ સિદ્ધૈયા નામના વ્યક્તિનું છે, જેણે દુબઈમાં રહેતા પ્રશાંત નામના શખ્સને ભાડે આપ્યું હતું. પ્રશાંતનો સંબંધી તેજસ ફાર્મહાઉસનું સંચાલન કરતો હતો. હાલ ફાર્મહાઉસમાં કામ કરતા પ્રભુ દેવા ગૌડાની અટકાયત કરીને પૂછપરછ કરવામાં આવતા તેણે કબૂલ્યું છે કે છેલ્લા પાંચ મહિનાથી આ ફાર્મહાઉસમાં નકલી દવાઓ પર રિ-લેબલિંગનું ગેરકાયદેસર કામ ચાલી રહ્યું હતું.