નવી દિલ્હી, તા.૧૯: પવિત્ર શ્રાવણ માસ દરમિયાન યોજાતી વાર્ષિક કંવર (કાવડ) યાત્રા દરમિયાનનો એક કથિત વાયરલ વીડિયો હાલ સોશિયલ મીડિયા પર ભારે ચર્ચા અને વિવાદનો વિષય બન્યો છે. આ વાયરલ વીડિયોમાં યાત્રા દરમિયાન ચાલતી એક ટ્રક પર બે મહિલાઓ અશ્લીલ નૃત્ય કરતી જોવા મળી રહી છે. જાણીતા યુટ્યુબર ધ્રુવ રાઠીએ બુધવારે આ વીડિયો પોતાના સોશિયલ મીડિયા હેન્ડલ પર શેર કરીને હિન્દુ જમણેરી સંગઠનો અને સંઘ પરિવારની ચૂપકીદી સામે સવાલો ઊભા કર્યા છે.

ધ્રુવ રાઠીએ વીડિયો શેર કરતા સોશિયલ મીડિયા પ્લેટફોર્મ 'X' પર લખ્યું કે, "આરએસએસ (RSS), બજરંગ દળ અને સંઘ પરિવાર અત્યારે ક્યાં છે? સનાતન ધર્મના આ કથિત અપમાન પર તેઓ સંપૂર્ણપણે મૌન સેવીને બેઠા છે. શું તેમને આનો વિરોધ કરવા માટે ફંડિંગ નથી મળ્યું?" રાઠીની આ પોસ્ટ બાદ ઇન્ટરનેટ પર નવી ચર્ચા છેડાઈ ગઈ છે, જેમાં અનેક લોકો આ પ્રકારના પ્રદર્શનની સખત શબ્દોમાં નિંદા કરી રહ્યા છે.

બીજી તરફ, સોશિયલ મીડિયા યુઝર્સ આ વીડિયોના લોકેશન અંગે અલગ-અલગ દાવાઓ કરી રહ્યા છે. કેટલાક યુઝર્સનું કહેવું છે કે આ ઘટના બિહારના સિવાન જિલ્લાની છે, જ્યારે અન્ય લોકો તેને ઉત્તર પ્રદેશનો વીડિયો ગણાવી રહ્યા છે. જોકે, આ વાયરલ ફૂટેજ ક્યાંનું છે, ક્યારનું છે અને તેની સાચી સત્યતા શું છે તે અંગે કોઈ સ્વતંત્ર કે સત્તાવાર પુષ્ટિ થઈ શકી નથી.

કંવર યાત્રા એ શ્રાવણ મહિનામાં ભગવાન શિવના ભક્તો (કંવરિયાઓ) દ્વારા હરિદ્વાર, ગૌમુખ, સુલ્તાનગંજ જેવા પવિત્ર સ્થળોએથી ગંગાજળ લાવીને શિવલિંગ પર જળાભિષેક કરવા માટે કરવામાં આવતી અત્યંત શ્રદ્ધાસ્પદ અને ધાર્મિક યાત્રા છે. આવા પવિત્ર પ્રસંગે અશ્લીલતા ફેલાવતા કથિત વીડિયો સામે આવતા જ સાચા શિવભક્તો અને નેટીઝન્સમાં પણ ભારે રોષ જોવા મળી રહ્યો છે.