ચંદીગઢ : પંજાબમાં આગામી ૨૧ ઓગસ્ટ, શુક્રવારના રોજ રાજ્યવ્યાપી બંધનું એલાન આપવામાં આવ્યું છે. કૌમી ઇન્સાફ મોરચા દ્વારા સજા પૂરી કરી ચૂકેલા શીખ કેદીઓની મુક્તિની માગણીને લઈને આ બંધનું આહ્વાન કરવામાં આવ્યું છે. મોરચાના નેતાઓએ બુધવારે યોજેલી પત્રકાર પરિષદમાં આ અંગેની સત્તાવાર જાહેરાત કરી હતી. આ બંધને પગલે સામાન્ય જનતામાં દૈનિક સુવિધાઓ અને પરિવહનને લઈને અનેક ચિંતાઓ ઊભી થઈ છે.

કૌમી ઇન્સાફ મોરચા દ્વારા આપવામાં આવેલા આહ્વાન મુજબ, બંધનો સમય સવારે ૭:૦૦ વાગ્યાથી બપોરે ૨:૦૦ વાગ્યા સુધીનો રહેશે. આ સમયગાળા દરમિયાન હાઇવે બ્લોક કરીને વાહનવ્યવહાર સંપૂર્ણપણે અટકાવવાની યોજના છે. સરકારી અને ખાનગી બસ સેવાઓ તેમજ રેલ પરિવહન પ્રભાવિત થવાની શક્યતા છે. મોરચાએ તમામ વેપારી મંડળો, શૈક્ષણિક સંસ્થાઓ અને ફેક્ટરી માલિકોને પોતાના પ્રતિષ્ઠાનો બંધ રાખીને સહકાર આપવા અપીલ કરી છે.

ઈમરજન્સી સેવાઓ ચાલુ રહેશે, એરપોર્ટ અને લગ્નપ્રસંગના વાહનોને છૂટ

આ બંધ દરમિયાન સામાન્ય લોકોને તકલીફ ન પડે તે માટે કેટલીક આવશ્યક સેવાઓને મુક્તિ આપવામાં આવી છે. હોસ્પિટલો, મેડિકલ સ્ટોર્સ અને અન્ય તમામ કટોકટીની (ઈમરજન્સી) સેવાઓ રાબેતા મુજબ કાર્યરત રહેશે. આ ઉપરાંત એરપોર્ટ જઈ રહેલા મુસાફરો, લગ્નપ્રસંગ કે મિજબાની માટે મુસાફરી કરતા વાહનોને રોકવામાં આવશે નહીં.

શું છે મોરચાની મુખ્ય માગણીઓ?

કૌમી ઇન્સાફ મોરચાના નેતાઓ લાંબા સમયથી જેલમાં પોતાની નિર્ધારિત સજા પૂરી કરી ચૂક્યા હોય તેવા શીખ કેદીઓને તુરંત મુક્ત કરવાની માગ કરી રહ્યા છે. આ ઉપરાંત પૂર્વ મુખ્યમંત્રી બિઅંત સિંહની હત્યાના કેસમાં જેલમાં બંધ જગતાર સિંહ હવારા માટે પેરોલની પણ માગણી કરવામાં આવી રહી છે. મોરચાના નેતાઓએ રાજ્યના તમામ સામાજિક અને રાજકીય સંગઠનોને શાંતિપૂર્ણ રીતે આ બંધને ટેકો આપવા વિનંતી કરી છે.