મુંબઈ : મુંબઈના ભાયખલા સ્થિત પ્રખ્યાત સરકારી જેજે હોસ્પિટલે (JJ Hospital) તબીબી ક્ષેત્રે એક અદભુત સીમાચિહ્ન સર કર્યું છે. હોસ્પિટલના ડોક્ટરોની નિષ્ણાત ટીમે સફળતાપૂર્વક પોતાની પ્રથમ 'સર્વાઇકલ ડિસ્ક રિપ્લેસમેન્ટ' (Cervical Disc Replacement - CDR) સર્જરી પાર પાડી છે. ઉત્તર પ્રદેશના ૩૫ વર્ષીય એક અત્યંત આર્થિક રીતે નબળા દર્દી પર આ અત્યાધુનિક અને ખર્ચાળ પ્રક્રિયા સંપૂર્ણપણે મફતમાં કરવામાં આવી છે, જે મહારાષ્ટ્રની જાહેર આરોગ્ય સેવાઓ માટે એક મોટો વિજય માનવામાં આવે છે.

પીડિત દર્દી કરોડરજ્જુના દબાણને કારણે 'સર્વાઇકલ ડિસ્ક હર્નિએશન' અને 'સર્વાઇકલ માયલોપથી' જેવી ગંભીર સ્થિતિથી પીડાતો હતો. આ રોગને કારણે તેના ગરદન અને હાથમાં અસહ્ય દુખાવો, સુન્નતા, હાથની પકડ નબળી પડવી અને રોજિંદા કાર્યો કરવામાં ભારે મુશ્કેલી પડી રહી હતી. જો સમયસર આ સારવાર ન મળી હોત, તો દર્દીને કાયમી ધોરણે ન્યુરોલોજીકલ નુકસાન અને લકવા જેવી સ્થિતિનો સામનો કરવો પડ્યો હોત.

નિષ્ણાત ડોક્ટરોની ટીમે કરી સફળ સર્જરી

આ જટિલ સર્જરી ઓર્થોપેડિક્સ વિભાગના વડા ડો. નાદિર શાહના માર્ગદર્શન હેઠળ સ્પાઇન સર્જન ડો. કુશલ ગોહિલ દ્વારા કરવામાં આવી હતી. આ પ્રક્રિયામાં ક્ષતિગ્રસ્ત કુદરતી ડિસ્કને દૂર કરીને તેની જગ્યાએ કૃત્રિમ ડિસ્ક (Artificial Disc) બેસાડવામાં આવી છે. પરંપરાગત સ્પાઇનલ ફ્યુઝનથી વિપરીત, આ પદ્ધતિથી દર્દીની ગરદનની હલનચલન સામાન્ય રહે છે. આ સફળ ઓપરેશનમાં ડીન ડો. અજય ભંડારવાર, મેડિકલ સુપરિન્ટેન્ડેન્ટ ડો. સંજય સુરાસે તેમજ ડો. ઉષા બડોલે અને ડો. પ્રેરણા જોગદંડની એનેસ્થેસિયા ટીમે મહત્વનો સહયોગ આપ્યો હતો.

મોંઘી સારવાર હવે ગરીબો માટે પણ સુલભ

ખાનગી હોસ્પિટલોમાં સર્વાઇકલ ડિસ્ક રિપ્લેસમેન્ટ માટે વપરાતા વિશેષ પ્રોસ્થેસિસ અને ઇમ્પ્લાન્ટને કારણે લાખો રૂપિયાનો ખર્ચ થાય છે. ડો. ગોહિલે જણાવ્યું હતું કે આવી એડવાન્સ્ડ કરોડરજ્જુની સારવાર માત્ર ધનિકો કે ખાનગી હોસ્પિટલો સુધી મર્યાદિત ન રહેવી જોઈએ. જેજે હોસ્પિટલના આ સફળ પ્રયાસે સાબિત કરી દીધું છે કે સરકારી હોસ્પિટલોમાં પણ જરૂરિયાતમંદ ગરીબ દર્દીઓને ઉચ્ચ સ્તરની મફત સારવાર મળી શકે છે. દર્દી હવે સંપૂર્ણપણે સ્વસ્થ થઈ રહ્યો છે અને તેને દુખાવામાંથી મોટી રાહત મળી છે.