નવી દિલ્હી, તા.૨૦: જાણીતા લેખિકા, શિક્ષણશાસ્ત્રી, પરોપકારી અને રાજ્યસભા સાંસદ સુધા મૂર્તિના ૭૬મા જન્મદિવસે સંસદ ભવનની અંદરથી એક અત્યંત હૃદયસ્પર્શી અને સ્નેહભરી ક્ષણ સામે આવી છે. રાજ્યસભા સાંસદ સ્વાતિ માલીવાલે સુધા મૂર્તિ માટે એક ખાસ અને લાગણીસભર નોંધ શેર કરીને તેમને જન્મદિવસની શુભેચ્છાઓ પાઠવી હતી, જેમાં તેમણે પોતાને પ્રેમથી "સુધા તાઈ પાગલુ" (સુધા તાઈના સૌથી મોટા પ્રશંસક) તરીકે ઓળખાવ્યા છે!

સ્વાતિ માલીવાલે સુધા મૂર્તિને માત્ર એક સાથી સાંસદ જ નહીં પરંતુ પોતાના "શ્રેષ્ઠ મિત્ર, માર્ગદર્શક અને પ્રેરણાસ્રોત" ગણાવ્યા હતા. તેમણે લખ્યું કે સંસદમાં દેશની સૌથી સફળ અને અનુભવી હસ્તીઓમાંના એક હોવા છતાં, સુધા મૂર્તિ તેમના ઉત્સાહ, જિજ્ઞાસા અને શક્તિના કારણે "હૃદયથી સંસદના સૌથી યુવાન સભ્ય" જેવા લાગે છે!

માલીવાલે સુધા મૂર્તિના વ્યક્તિત્વના વખાણ કરતા તેમને ખૂબ જ કૂલ, રમૂજી, ઉર્જાવાન, ધ્યાન કેન્દ્રિત કરનારી અને અત્યંત નમ્ર વ્યક્તિ તરીકે વર્ણવ્યા હતા.

સાદગી જ જેમને સુંદર બનાવે છે

આ ખાસ પોસ્ટમાં સ્વાતિ માલીવાલે સુધા મૂર્તિની અદભુત સાદગીની પ્રશંસા કરી હતી. તેમણે નોંધ્યું કે જીવનમાં આટલી બધી સિદ્ધિઓ અને સફળતા મેળવ્યા પછી પણ સુધા મૂર્તિ જે રીતે પહેરવેશ પસંદ કરે છે, સાદું ભોજન લે છે અને લોકો સાથે પ્રેમથી વર્તે છે, તે દરેક ક્ષણે તેમની સાદગીને દર્શાવે છે.

સંસદ સત્ર દરમિયાન સાથે વિતાવેલી ક્ષણોની તસવીરો શેર કરતા, જેમાં બંને સાંસદો ક્લાસિક સાડી લુકમાં હસતા હસતા સંસદમાંથી બહાર નીકળતા જોવા મળે છે, સ્વાતિ માલીવાલે લખ્યું:

"સુધા તાઈ સાથે વિતાવેલો દરેક ક્ષણ એ શીખવાની અને હાસ્યથી ભરેલી સફર રહી છે. તેમની સાથેની વાતચીતે મને સંસદના વાતાવરણમાં વધુ સાંભળવા, સકારાત્મક રીતે આગળ વધવા અને મારા કામમાં વધુ અર્થ અને આનંદ શોધવામાં મદદ કરી છે. હું મારા જીવનમાં તેમની હાજરી માટે મારી જાતને અત્યંત નસીબદાર માનું છું."

પોતાના સંદેશના અંતમાં સ્વાતિ માલીવાલે આશા વ્યક્ત કરી હતી કે સુધા મૂર્તિ હંમેશાં આવી જ રીતે જિજ્ઞાસુ, યુવાન, ઊર્જાવાન અને લાખો લોકો માટે અનંત પ્રેરણાનો સ્ત્રોત બની રહે.