નવી દિલ્હી, તા.૨૦: આંતરરાષ્ટ્રીય રાજકારણમાં સર્જાયેલી ભારે ઉત્તેજના વચ્ચે વૈશ્વિક ઊર્જા બજારમાં ફરી એકવાર મોટી હલચલ જોવા મળી રહી છે. ઇરાનને આર્થિક રીતે સાવ એકલું-અટૂલું પાડી દેવાના હેતુથી યુએસ પ્રમુખ ડોનાલ્ડ ટ્રમ્પ દ્વારા એક નવા જ પ્રકારના 'આર્થિક યુદ્ધ'ની જાહેરાત કરવામાં આવી છે. આ કડક પ્રતિબંધોને કારણે વૈશ્વિક સ્તરે ક્રૂડ ઓઇલના પુરવઠામાં મોટો વિઘ્ન આવવાની આશંકા જાગી છે, જેના પરિણામે ગુરુવારે શરૂઆતના ઘટાડા બાદ ક્રૂડ ઓઇલ વાયદાના ભાવમાં ૧ ટકાથી વધુનો તીવ્ર ઉછાળો નોંધાયો હતો.

ભારતીય મલ્ટી કોમોડિટી એક્સચેન્જ (MCX) પર સપ્ટેમ્બર ડિલિવરી માટે ક્રૂડ ઓઇલનો ભાવ રૂ. ૯૬ (૧.૧૮ ટકા) વધીને રૂ. ૮,૨૪૭ પ્રતિ બેરલની ઊંચી સપાટીએ પહોંચી ગયો હતો. તો બીજી તરફ, ઓક્ટોબર કોન્ટ્રેક્ટ પણ રૂ. ૯૧ વધીને રૂ. ૮,૦૯૭ પ્રતિ બેરલ થયો હતો. વિશ્લેષકોના જણાવ્યા મુજબ, ભારતીય વાયદા બજારમાં ક્રૂડ માટે આ સતત પાંચમું તેજીનું સત્ર રહ્યું છે. આંતરરાષ્ટ્રીય સ્તરે બ્રેન્ટ ક્રૂડ ફ્યુચર્સ ૨.૧૩ ટકા વધીને ૯૩.૫૭ ડોલર અને યુએસ ડબ્લ્યુટીઆઈ (WTI) ક્રૂડ ૨.૨૨ ટકા વધીને ૮૬.૨૬ ડોલર પ્રતિ બેરલ પર પહોંચી ગયું હતું.

બજારમાં આ અચાનક આવેલી તેજી પાછળ ટ્રમ્પની સોશિયલ મીડિયા પ્લેટફોર્મ 'ટ્રુથ સોશિયલ' પર કરાયેલી એક આક્રમક પોસ્ટ જવાબદાર છે. ટ્રમ્પે સ્પષ્ટ ચેતવણી આપતા કહ્યું હતું કે, "હું ઇતિહાસની સૌથી કારમી આર્થિક કાર્યવાહીની ઘોષણા કરી રહ્યો છું. આ અભૂતપૂર્વ સ્તરનું આર્થિક યુદ્ધ હશે. જે પણ દેશ કે સંસ્થા ઇરાનને નાણાકીય કે વ્યાપારી જીવનરેખા પૂરી પાડશે, તેણે ગંભીર આર્થિક પરિણામો ભોગવવા પડશે." જોકે, આ પ્રતિબંધો ક્યારથી અને કયા વિશિષ્ટ ક્ષેત્રો પર લાગુ થશે તેની સ્પષ્ટ વિગતો હજુ જાહેર કરવામાં આવી નથી.

બ્રોકરેજ ફર્મ કોટક નીઓ અનુસાર, રોકાણકારો હાલમાં ઈરાની તેલના સપ્લાયમાં ઘટાડાના જોખમને ધ્યાનમાં રાખીને ટ્રેડિંગ કરી રહ્યા છે. ખાસ કરીને તેલના વેપાર માટે સૌથી મહત્ત્વપૂર્ણ ગણાતી 'સ્ટ્રેટ ઓફ હોર્મુઝ' (સામુદ્રધુની) ફરી એકવાર તણાવનું કેન્દ્ર બની છે. જો આ વ્યૂહાત્મક શિપિંગ રૂટ પર સપ્લાય અવરોધાય અથવા ઈરાન તરફથી કોઈ વળતો જવાબ આપવામાં આવે, તો તેલના ભાવ હજુ વધુ ભડકે બળે તેવી શક્યતા નિષ્ણાતો વ્યક્ત કરી રહ્યા છે.