નવી દિલ્હી, તા.૨૦: સંકટના સમયમાં પડોશી દેશોની મદદે આવવાની પોતાની દીર્ઘકાલીન પરંપરાને જાળવી રાખીને ભારતે અફઘાનિસ્તાનના નાગરિકો માટે માનવતાવાદી સહાયનો વધુ એક મોટો જથ્થો રવાના કર્યો છે. ભારતીય વિદેશ મંત્રાલય (MEA) દ્વારા ગુરુવારે આપવામાં આવેલી માહિતી મુજબ, કાબુલની એક સરકારી હોસ્પિટલમાં જરૂરી દવાઓ અને તબીબી ઉપભોગ્ય વસ્તુઓનો નવો જથ્થો સફળતાપૂર્વક પહોંચાડવામાં આવ્યો છે. આ પગલાથી અફઘાનિસ્તાનના મૈત્રીપૂર્ણ લોકો સાથે ભારતની સ્થાયી આરોગ્ય ભાગીદારી વધુ મજબૂત બની છે.

વિદેશ મંત્રાલયના પ્રવક્તા રણધીર જયસ્વાલે તાજેતરમાં મીડિયા બ્રીફિંગ દરમિયાન જણાવ્યું હતું કે છેલ્લા એક વર્ષમાં ભારત અને અફઘાનિસ્તાન વચ્ચેના દ્વિપક્ષીય સંબંધોને નવી ગતિ મળી છે. ભારતે રાજદ્વારી સંવાદ, માનવતાવાદી સહાય અને વિકાસલક્ષી માળખા પર વિશેષ ભાર મૂક્યો છે. ભારતે સ્પષ્ટ કર્યું છે કે અફઘાન નાગરિકોની જરૂરિયાતો અને સ્વાસ્થ્ય સુરક્ષા જ નવી દિલ્હીની પ્રાથમિકતા રહેશે.

નોંધનીય છે કે આ અગાઉ પણ ભારતે અફઘાનિસ્તાનને વિવિધ ક્ષેત્રે મોટી મદદ પૂરી પાડી છે. તાજેતરમાં જ નુરિસ્તાનમાં આવેલા વિનાશક પૂર બાદ ભારતે રાશન અને ઇમરજન્સી ફેમિલી ટેન્ટ સહિતની રાહત સામગ્રી અફઘાન ડિઝાસ્ટર મેનેજમેન્ટ ઓથોરિટીને સોંપી હતી. આ ઉપરાંત, જૂન મહિનામાં પણ ૫ ટનથી વધુ આવશ્યક દવાઓ કાબુલ મોકલવામાં આવી હતી, જેથી ત્યાંની કથળતી જતી તબીબી સુવિધાઓને સહારો આપી શકાય.

અફઘાનિસ્તાનમાં નાના બાળકોના આરોગ્ય અને રસીકરણ કાર્યક્રમને વેગ આપવા માટે ભારતે મે મહિનામાં ૨૦ ટન જેટલી બીસીજી (BCG) તેમજ ટિટાનસ અને ડિપ્થેરિયા (Td) ની રસીઓનો મોટો જથ્થો રવાના કર્યો હતો. સંકટની દરેક ઘડીમાં અફઘાનિસ્તાનની સાથે અડીખમ ઊભા રહીને ભારતે સાબિત કર્યું છે કે રાજકીય અસ્થિરતા વચ્ચે પણ માનવતા અને મિત્રતાના સંબંધો સર્વોપરી છે.