વોશિંગ્ટન, તા.૨૦: અમેરિકાના પ્રમુખ ડોનાલ્ડ ટ્રમ્પે ઈરાનની અર્થવ્યવસ્થાને સંપૂર્ણપણે ધ્વસ્ત કરવાના હેતુથી અત્યાર સુધીના સૌથી કડક અને અભૂતપૂર્વ આર્થિક અભિયાનની જાહેરાત કરી છે. ઇસ્લામિક રિપબ્લિક ઈરાન સાથે કોઈપણ પ્રકારનો નાણાકીય કે વ્યાપારી વ્યવહાર રાખનારા અથવા તેને સહાય પૂરી પાડનારા દેશો માટે ટ્રમ્પે "ભયંકર આર્થિક પરિણામો" ભોગવવાની સીધી ચેતવણી આપી છે. મધ્ય પૂર્વમાં ચાલી રહેલું યુદ્ધ તેના છઠ્ઠા મહિનામાં પ્રવેશવા જઈ રહ્યું છે ત્યારે અમેરિકાના આ આક્રમક પગલાથી વૈશ્વિક સ્તરે મોટો રાજદ્વારી અને આર્થિક ગરમાવો આવી ગયો છે.

પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર એક કડક સંદેશ પોસ્ટ કરતા ટ્રમ્પે લખ્યું હતું કે, "આજે હું કોઈપણ દેશ સામે ઇતિહાસના સૌથી કઠોર આર્થિક ઓપરેશનની જાહેરાત કરી રહ્યો છું. આ એક અભૂતપૂર્વ સ્તરનું આર્થિક યુદ્ધ અને ઈરાનનું સંપૂર્ણ આંતરરાષ્ટ્રીય અલગીકરણ હશે." તેમણે વધુમાં ઉમેર્યું હતું કે જે પણ દેશ પોતાની બેંકો, વ્યવસાયો, એરપોર્ટ કે સરકારી સંસ્થાઓ દ્વારા ઈરાનને કોઈપણ પ્રકારની આર્થિક મદદ કે જીવનરેખા આપશે, તેને અમેરિકાના ભારે આક્રોશ અને દંડનો સામનો કરવો પડશે.

ટ્રમ્પે ઈરાન સાથે ચાલતી તમામ પ્રકારની ગેરકાયદેસર પ્રવૃત્તિઓ જેવી કે તેલની દાણચોરી, કેશ ટ્રાન્સફર, કરન્સી એક્સચેન્જ હાઉસ, શિપ રજિસ્ટ્રી અને બોગસ ફ્રન્ટ કંપનીઓના કારોબારને તાત્કાલિક અસરથી બંધ કરવાનો આદેશ આપ્યો છે. આ વ્યૂહરચનાના ભાગરૂપે યુએસ ટ્રેઝરી સેક્રેટરી સ્કોટ બેસેંટે સંકેત આપ્યા છે કે અમેરિકા ખૂબ જ ટૂંક સમયમાં બે-માર્ગીય વ્યૂહરચના અપનાવશે, જેમાં આકરા નાણાકીય પ્રતિબંધોની સાથે અમેરિકી નૌકાદળ (US Navy) દ્વારા ઈરાન ફરતે દરિયાઈ નાકાબંધીનો પણ સમાવેશ થાય છે.

મહત્વની દરિયાઈ સીમા 'હોર્મુઝ સ્ટ્રેટ' બંધ હોવાના કારણે પહેલાથી જ વૈશ્વિક ઊર્જા પુરવઠો પ્રભાવિત થયો છે, ત્યારે ટ્રમ્પે પોતાના સાથી દેશોને પણ ઈરાન સામેના આ આક્રમક અભિયાનમાં અમેરિકા સાથે મજબૂતીથી ઊભા રહેવા આહવાન કર્યું છે. જોકે, અમેરિકામાં આગામી નવેમ્બરમાં યોજાનારી પ્રમુખપદની ચૂંટણીઓ પૂર્વે આ વધતા લશ્કરી અને આર્થિક તણાવની સ્થાનિક ગ્રાહકો તથા વૈશ્વિક બજાર પર શું અસર પડશે તે અંગે વિશ્લેષકોમાં ભારે ચિંતા જોવા મળી રહી છે.