મસૂરી : ઉપરાષ્ટ્રપતિ સી. પી. રાધાકૃષ્ણને મસૂરી સ્થિત લાલ બહાદુર શાસ્ત્રી નેશનલ એકેડેમી ઓફ એડમિનિસ્ટ્રેશન (LBSNAA) ખાતે ૨૦૨૪ બેચના IAS અધિકારી તાલીમાર્થીઓના 'ફેઝ-II' તાલીમના સમાપન સમારોહને સંબોધિત કરતા યુવા અમલદારોને દેશસેવા માટે સમર્પિત રહેવા હાકલ કરી છે. તેમણે તમામ સિવિલ સર્વન્ટ્સને "સેવાભાવ અને કર્તવ્યબોધ"ને પોતાનો મુખ્ય માર્ગદર્શક મંત્ર બનાવીને પારદર્શક, ઈમાનદાર અને નાગરિક-કેન્દ્રિત શાસન પ્રદાન કરવાની અપીલ કરી હતી.

તાલીમ સફળતાપૂર્વક પૂર્ણ કરવા બદલ યુવા અધિકારીઓને શુભેચ્છા પાઠવતા ઉપરાષ્ટ્રપતિએ ભારપૂર્વક જણાવ્યું હતું કે, દેશના સર્વાંગી વિકાસમાં અને સરકારી નીતિઓને પાયાના સ્તરે યોગ્ય રીતે અમલમાં મૂકવામાં ભારતીય વહીવટી સેવાની ભૂમિકા અત્યંત મહત્વપૂર્ણ છે. વર્ષ ૨૦૪૭ સુધીમાં 'વિકસિત ભારત'ના નિર્માણ માટેના દ્રષ્ટિકોણને રેખાંકિત કરતા તેમણે અધિકારીઓને આગ્રહ કર્યો હતો કે સરકારી યોજનાઓનો લાભ સમાજના અંતિમ અગ્રણી સુધી પહોંચે અને વિકાસ સંપૂર્ણપણે સમાવેશી (Inclusive) હોવો જોઈએ.

આ પ્રસંગે સિવિલ સેવાઓમાં મહિલાઓના સતત વધી રહેલા વર્ચસ્વની પ્રશંસા કરતા ઉપરાષ્ટ્રપતિએ નોંધ્યું હતું કે ૨૦૨૪ની બેચમાં લગભગ ૪૧ ટકા મહિલાઓ સામેલ છે. તેમણે આ સિદ્ધિને દેશની 'નારી શક્તિ'નું એક શક્તિશાળી ઉદાહરણ ગણાવ્યું હતું, જે દર્શાવે છે કે યોગ્ય પ્રતિભા અને દ્રઢ નિશ્ચય આગળ તમામ રૂઢિચુસ્ત અવરોધો દૂર થઈ જાય છે. આ ઉપરાંત તેમણે અધિકારીઓને વ્યક્તિગત સિદ્ધિઓ કરતાં 'ટીમવર્ક'ને પ્રાધાન્ય આપીને સાથીદારોને પ્રેરિત કરવા ટાંક્યું હતું.

બદલાતા સમય સાથે તાલ મિલાવવા માટે ઉપરાષ્ટ્રપતિએ જાહરે સેવા વિતરણ પ્રણાલીને વધુ ઝડપી અને સુચારુ બનાવવા માટે આર્ટિફિશિયલ ઇન્ટેલિજન્સ (AI), નેચરલ લેંગ્વેજ પ્રોસેસિંગ, મશીન લર્નિંગ અને બ્લોકચેન જેવી નવીન તકનીકોને વહીવટમાં અપનાવવા હાકલ કરી હતી. તેમણે ઉમેર્યું હતું કે સાચું નેતૃત્વ પદ કે સત્તાથી નહીં, પરંતુ નૈતિક મૂલ્યો અને ચારિત્ર્યથી માપવામાં આવે છે. આ કાર્યક્રમમાં ઉત્તરાખંડના રાજ્યપાલ લેફ્ટનન્ટ જનરલ (નિવૃત્ત) ગુરમિત સિંહ અને LBSNAA ના ડિરેક્ટર ડૉ. બી. રાજેન્દ્ર સહિતના અગ્રણીઓ ઉપસ્થિત રહ્યા હતા.