લખનૌ : ઉત્તર પ્રદેશના મુખ્યમંત્રી યોગી આદિત્યનાથે રાજ્યના યુવાનોને આધુનિક કૌશલ્ય, ઉદ્યોગ-આધારિત તાલીમ અને આંતરરાષ્ટ્રીય સ્તરે રોજગારીની તકો પૂરી પાડવા માટે એક મહત્વકાંક્ષી યોજનાની સમીક્ષા કરી છે. વ્યાવસાયિક શિક્ષણ, કૌશલ્ય વિકાસ અને ઉદ્યોગસાહસિકતા વિભાગની બેઠક દરમિયાન તેમણે નિર્દેશ આપ્યા હતા કે રાજ્યની તમામ industrial training institutes (ITI) ને મહત્તમ ઉદ્યોગો સાથે જોડવામાં આવે. આ સાથે જ ઉદ્યોગોની બદલાતી જરૂરિયાતો મુજબ નવેસરથી અભ્યાસક્રમો, એપ્રેન્ટિસશીપ અને ઓન-ધ-જોબ ટ્રેનિંગ પ્રોગ્રામ શરૂ કરવા પર ભાર મુકાયો છે.

રાજ્યમાં ટેકનોલોજીકલ ક્રાંતિ લાવવાના ભાગરૂપે ગોરખપુર, મુઝફ્ફરનગર અને બરેલી ખાતે 'સેન્ટર ફોર ઇનોવેશન, ઇન્વેન્શન, ઇન્ક્યુબેશન એન્ડ ટ્રેનિંગ' (CIIIIT) કેન્દ્રોની કામગીરી વહેલી તકે શરૂ કરવા આદેશ આપવામાં આવ્યા છે. હાલમાં ટાટા ટેક્નોલોજીસના સહયોગથી ૧૫૦ સરકારી ITI ને અપગ્રેડ કરી દેવામાં આવી છે, જ્યારે અન્ય ૬૨ ITI ના અપગ્રેડેશનની પ્રક્રિયા ચાલી રહી છે. આ ઉપરાંત વિવિધ ઉદ્યોગોના સામાજિક સહયોગથી ૩૭ સરકારી ITI માં અત્યાધુનિક સ્કિલ લેબ્સ પણ સ્થાપિત કરવામાં આવી છે.

વૈશ્વિક સ્તરે માનવબળની માંગને પહોંચી વળવા માટે ઉત્તર પ્રદેશ સરકારે જાપાન અને જર્મની જેવા દેશોની જરૂરિયાતો અનુસાર યુવાનો માટે વિદેશી ભાષાઓમાં ડિજિટલ તાલીમ આપવાની યોજના તૈયાર કરી છે. ટ્રેનિંગ દરમિયાન તમામ તાલીમાર્થીઓ માટે અંગ્રેજી ભાષા શીખવી ફરજિયાત કરવામાં આવી છે. આ ઉપરાંત 'શૂન્ય ગરીબી અભિયાન' હેઠળ અત્યાર સુધીમાં ૧૪ થી ૩૫ વર્ષની વય જૂથના ૯.૫૨ લાખ યુવાનોનું વેરિફિકેશન પૂર્ણ કરવામાં આવ્યું છે, જેમાંથી પાત્ર ઠરેલા યુવાનોને રોજગાર અને સ્વરોજગારી સાથે જોડવા માટે કૌશલ્ય તાલીમ પૂરી પાડવામાં આવશે.

મુખ્યમંત્રીએ સ્પષ્ટપણે જણાવ્યું હતું કે કૌશલ્ય તાલીમની ખરી સફળતા માત્ર તાલીમાર્થીઓની સંખ્યા પરથી નહીં, પરંતુ તેમને મળતા રોજગાર અને સ્વ-રોજગારના પરિણામો પરથી નક્કી થવી જોઈએ. છેલ્લા પાંચ વર્ષમાં રાજ્ય કૌશલ્ય વિકાસ મિશન હેઠળ ૨૧.૧૩ લાખ યુવાનોએ તાલીમ મેળવી છે, જેમાંથી ૧૨.૯૪ લાખથી વધુ યુવાનોને સફળતાપૂર્વક નોકરી પ્રાપ્ત થઈ છે. વિભાગીય મુખ્યાલયો પર નિયમિત રોજગાર મેળાઓ યોજીને યુપીને દેશનું સૌથી મોટું કૌશલ્ય કેન્દ્ર બનાવવાની દિશામાં ઝડપી કામગીરી ચાલી રહી છે.