મુંબઈ : મુંબઈના બાંદ્રા રિક્લેમેશન સ્થિત પ્રખ્યાત 'નેવિલ ડિસોઝા ફૂટબોલ ગ્રાઉન્ડ'ને પ્રદર્શન અને કન્વેશન સેન્ટરમાં રૂપાંતરિત કરવાના બૃહન્મુંબઈ મહાનગરપાલિકા (BMC) ના વિવાદસ્પદ પ્રસ્તાવ પર બોમ્બે હાઈકોર્ટે કડક વલણ અપનાવ્યું છે. કાર્યકારી મુખ્ય ન્યાયાધીશ રવિન્દ્ર ઘુગે અને ન્યાયાધીશ ગૌતમ અંકડની ખંડપીઠે આગામી ૧૮ સપ્ટેમ્બરની સુનાવણી સુધી આ ગ્રાઉન્ડના અનામત (Reservation) માં ફેરફાર કરવા અંગેના તમામ આગળના પગલાં પર વચગાળાનો સ્ટે મૂકી દીધો છે. કોર્ટે અત્યંત નારાજગી વ્યક્ત કરતા કહ્યું કે, પાલિકાના વકીલે અગાઉ કોર્ટમાં આપેલી બાંયધરી વિશે મ્યુનિસિપલ કમિશનરને જાણ પણ ન કરવામાં આવી તે બાબત અત્યંત "દુર્ભાગ્યપૂર્ણ" છે.

કેસની ગંભીરતા પર પ્રકાશ પાડતા બોમ્બે હાઈકોર્ટે સખત શબ્દોમાં ટિપ્પણી કરી હતી કે, "તમારે અમને જણાવવું પડશે કે હવે લોકો અને બાળકો ફૂટબોલ ક્યાં રમશે? શહેરમાં કેટલાક ખુલ્લા મેદાનો બાકી રાખવા જ પડશે. જો આમ જ ચાલતું રહ્યું તો આવનારી પેઢીઓ બહાર રમાતી મેદાની રમતો શું હોય છે તે જ ભૂલી જશે." કોર્ટે વધુમાં ઉમેર્યું કે જો ચૂંટાયેલા પ્રતિનિધિઓ કે અધિકારીઓ અદાલતી કાર્યવાહી અને બાંયધરીને હળવાશથી લઈને મજાક ઉડાવશે તો કાયદાની ભવ્યતા અને સન્માન દાવ પર લાગી જશે, જે ચલાવી લેવાશે નહીં.

આ સમગ્ર વિવાદ મુંબઈ ફૂટબોલ એસોસિએશન (MFA) દ્વારા દાખલ કરવામાં આવેલી અરજી બાદ સામે આવ્યો છે. MFA વતી હાજર રહેલા એડવોકેટ ઝાલ અંધ્યારુજિનાએ કોર્ટનું ધ્યાન દોર્યું હતું કે ૧૦ ઓગસ્ટના રોજ BMC એ સ્ટેડિયમનું રૂપાંતર ન કરવાની ખાતરી આપી હતી, પરંતુ તે જ દિવસે જનરલ બોડીની બેઠકમાં એવો દાવો કરવામાં આવ્યો હતો કે કોર્ટનો કોઈ સ્ટે નથી અને પ્રસ્તાવ પર આગળ વધવાનો નિર્ણય લેવાયો હતો. બીજી તરફ, BMC વતી હાજર વરિષ્ઠ વકીલે દાવો કર્યો હતો કે જનરલ બોડીનો એજન્ડા અગાઉથી નક્કી હતો અને કમિશનર સુધી કોર્ટની કાર્યવાહીની માહિતી સમયસર પહોંચી શકી નહોતી.

હાઈકોર્ટે પાલિકાના કાનૂની વિભાગની આવી બેદરકારી સામે ગંભીર સવાલો ઉઠાવ્યા છે અને સ્પષ્ટ કર્યું છે કે કોર્ટમાં અપાતી બાંયધરીઓનું પાલન થવું જ જોઈએ. અદાલતે આ મામલે મુંબઈ મ્યુનિસિપલ કોર્પોરેશન (BMC) અને મહારાષ્ટ્ર હાઉસિંગ એન્ડ એરિયા ડેવલપમેન્ટ ઓથોરિટી (MHADA) ને નોટિસ ફટકારીને જવાબ દાખલ કરવા આદેશ આપ્યો છે. આગામી સુનાવણી સુધી ફૂટબોલ ગ્રાઉન્ડના વાસ્તવિક સ્વરૂપ સાથે કોઈ પણ પ્રકારની છેડછાડ કે ફેરફાર કરવા પર કડક મનાઈ હુકમ ચાલુ રહેશે.