મુંબઈ : મુંબઈ મહાનગરપાલિકા (BMC) એ યુવા વ્યાવસાયિકો અને તાજેતરના ગ્રેજ્યુએટ્સ માટે નાગરિક શાસન (Civic Governance) અને જાહેર વહીવટમાં જોડાઈને કામ કરવાનો એક મોટો અવસર પૂરો પાડ્યો છે. મહાયુતિ સંચાલિત બીએમસીએ 'Gen Z ફેલોશિપ પ્રોગ્રામ' ની જાહેરાત કરી છે, જેમાં પસંદગી પામેલા ૫૦ યુવાનોને ૧૨ મહિનાના કરાર આધારિત કાર્યકાળ માટે દર મહિને ₹૬૧,૫૦૦ નું આકર્ષક સ્ટાઈપેન્ડ આપવામાં આવશે.

મહારાષ્ટ્ર સરકારના સફળ 'મુખ્યમંત્રી ફેલોશિપ પ્રોગ્રામ' ના મોડેલ પર આધારિત આ પહેલ હેઠળ, ફેલો તરીકે પસંદ પામેલા યુવાનોને મ્યુનિસિપલ કમિશનર, એડિશનલ કમિશનરો, વિવિધ વિભાગીય વડાઓ તેમજ વરિષ્ઠ અધિકારીઓ સાથે સીધા કામ કરવાની તક મળશે. તેમની મુખ્ય જવાબદારીઓમાં નીતિ નિર્માણ, પ્રોજેક્ટ પ્લાનિંગ, ડેટા એનાલિસિસ, રિપોર્ટ તૈયાર કરવા, વહીવટી સંકલન અને નાગરિક સેવાઓના સુધારા માટે મહત્વપૂર્ણ સુચનો આપવાનો સમાવેશ થાય છે.

આ ફેલોશિપ માટે ૨૮ વર્ષથી ઓછી ઉંમર ધરાવતા ગ્રેજ્યુએટ યુવાનો, જેમને મરાઠી, હિન્દી અને અંગ્રેજી ભાષાનું સારું જ્ઞાન હોય તેમજ કમ્પ્યુટર સ્કિલ્સ હોય, તેઓ અરજી કરી શકે છે. ૧૯ ઓગસ્ટથી શરૂ થયેલી આ અરજી પ્રક્રિયા ૩૧ ઓગસ્ટ, ૨૦૨૬ સુધી ખુલ્લી રહેશે. બીજી તરફ, નાગરિક સંગઠન 'વોચડોગ ફાઉન્ડેશન' એ આ પગલાંને આવકારીને વિનંતી કરી છે કે મુંબઈ જેવા ૧.૫ કરોડની વસ્તી ધરાવતા શહેર માટે દરેક વોર્ડ દીઠ ઓછામાં ઓછા ૧૦ ફેલો ફાળવીને કુલ ૨૫૦ જગ્યાઓ કરવામાં આવે જેથી સ્થાનિક મુદ્દાઓ વધુ સારી રીતે ઉકેલી શકાય.