નવી દિલ્હી : સુપ્રીમ કોર્ટે શુક્રવારે એક અત્યંત સંવેદનશીલ અને માનવતાવાદી ચુકાદો આપતાં ૧૯૮૮ના એક હત્યા કેસમાં આજીવન કેદની સજા ભોગવી રહેલા ૧૦૫ વર્ષના વડીલ કેદી રસિક ચંદ્ર મંડલને કાયમી મુક્તિ આપી છે. સર્વોચ્ચ અદાલતે ૨૦૨૪માં આપવામાં આવેલા વચગાળાના જામીનના આદેશને આખરી આદેશમાં ફેરવીને તેમની બાકીની તમામ સજા સંપૂર્ણપણે માફ કરી દીધી છે.

દાયકાઓ જૂની કાનૂની લડાઈનો આખરે માનવીય અંત

પશ્ચિમ બંગાળના માલદા જિલ્લાના રહેવાસી અને ૧૯૨૦માં જન્મેલા રસિક ચંદ્ર મંડલ સામે ૧૯૮૮માં આઈપીસીની વિવિધ કલમો હેઠળ ગુનો નોંધાયો હતો. ૧૯૯૪માં ટ્રાયલ કોર્ટે તેમને દોષિત ઠેરવી આજીવન કેદની સજા સંભળાવી હતી, ત્યારે તેમની ઉંમર ૬૮ વર્ષની હતી. તેમણે હાઈકોર્ટ અને સુપ્રીમ કોર્ટમાં અપીલ કરી હતી પરંતુ સજા અકબંધ રહી હતી.

ઉંમર અને સ્વાસ્થ્યના આધારે સુપ્રીમ કોર્ટમાં ગુહાર

૨૦૨૦માં, ૯૯ વર્ષની ઉંમરે મંડલે કથળતી તંદુરસ્તી અને અતિશય વૃદ્ધાવસ્થાના આધારે અકાળે મુક્તિ માટે સુપ્રીમ કોર્ટના દરવાજા ખટખટાવ્યા હતા. લાંબી સુનાવણી બાદ નવેમ્બર ૨૦૨૪માં કોર્ટે તેમને વચગાળાના જામીન મંજૂર કર્યા હતા. શુક્રવારે ચીફ જસ્ટિસ સૂર્યકાંત, જસ્ટિસ જોયમલ્યા બાગચી અને જસ્ટિસ વી. મોહનાની બેન્ચે કેસની આખરી સુનાવણી કરતા સ્પષ્ટ કર્યું કે, "આટલી અતિશય વયે કેદીને ફરી જેલમાં મોકલવાનો કોઈ વ્યાજબી કે વ્યાવહારિક હેતુ સરતો નથી."

ત્રણ દાયકાની સજા બાદ મળ્યો કાયમી છુટકારો

મુખ્ય ન્યાયાધીશે આદેશ આપતાં જણાવ્યું કે જો તેમની આજીવન કેદની સજા પૂર્ણ ન થઈ હોય તો પણ હવે તેમને ફરી કસ્ટડીમાં લેવામાં આવશે નહીં. આ આદેશ સાથે જ ચાર દાયકા જૂના કેસ અને ત્રણ દાયકાથી વધુ સમયની કાનૂની યાતના બાદ ૧૦૫ વર્ષની વયે રસિક ચંદ્ર મંડલ એક મુક્ત નાગરિક તરીકે પોતાનું બાકીનું જીવન જીવી શકશે.