મુંબઈ : પરિવાર સાથે મળીને કામ કરવું એ કોઈપણ વ્યવસાયમાં સૌથી સલામત અને ભરોસાપાત્ર માર્ગ માનવામાં આવે છે, પરંતુ જાણીતી કલાકાર અને ઉદ્યોગસાહસિક અવંતિ નાગરાલ (Avanti Nagral) માટે આ અનુભવ માત્ર બે અઠવાડિયામાં જ પૂરો થઈ ગયો. અવંતિએ તાજેતરમાં પોતાની સોશિયલ મીડિયા પ્લેટફોર્મ LinkedIn પર એક અત્યંત સ્પષ્ટ અને વિચારવા જેવી પોસ્ટ શેર કરી છે, જેમાં તેણે જણાવ્યું છે કે કેવી રીતે તેણે તેની માતાને પોતાના મેનેજર પદેથી માત્ર ૧૫ દિવસની અંદર જ હટાવી દેવી પડી હતી. આ પોસ્ટે હવે વ્યાવસાયિક સીમાઓ અને કૌટુંબિક સંબંધો પર એક મોટી ચર્ચા જગાવી છે.

હાર્વર્ડ પહેલા ગેપ યર દરમિયાન શરૂ થઈ હતી કહાની

અવંતિએ પોતાની પોસ્ટમાં લખ્યું કે જ્યારે તે હાર્વર્ડ યુનિવર્સિટીમાં પ્રવેશ પહેલાં ગેપ યર લઈ રહી હતી, ત્યારે તે થિયેટર, મ્યુઝિક અને વિવિધ આંતરરાષ્ટ્રીય પ્રોજેક્ટ્સ માટે સતત પ્રવાસ કરી રહી હતી. તેનું શેડ્યૂલ અત્યંત વ્યસ્ત બની જતાં તેને ઈમેઈલ, વાટાઘાટો, ફી નક્કી કરવી, લોજિસ્ટિક્સ અને કામગીરી સંભાળવા માટે એક ભરોસાપાત્ર મેનેજરની જરૂર હતી. આ સમયે તેની માતાએ પોતે જ આ જવાબદારી સ્વૈચ્છિક રીતે સ્વીકારી. અવંતિને પણ લાગ્યું કે તેની માતાએ ભૂતકાળમાં પોતાની કારકિર્દી અનેકવાર સફળતાપૂર્વક બનાવી છે, તેથી તે આ ભૂમિકા માટે સર્વશ્રેષ્ઠ રહેશે.

માતા અને મેનેજર વચ્ચે ઘર્ષણ: સલામતી સામે કારકિર્દી

જોકે, આ વ્યાવસાયિક વ્યવસ્થા ઝડપથી મુશ્કેલીમાં મુકાઈ ગઈ. અવંતિની માતા મેનેજર તરીકે વ્યવસાયિક નિર્ણયો લેવાને બદલે એક માતા તરીકે નિર્ણયો લેવા લાગી હતી. તે મોડી રાતના શો, અજાણ્યા શહેરોના પ્રવાસ કે જે પ્રોજેક્ટમાં પ્રેક્ષકોનું અગાઉથી મૂલ્યાંકન ન થઈ શકે તેવા શો માટેની તકો સીધી જ ફગાવી દેતી હતી. અવંતિએ સ્પષ્ટ કર્યું કે તેની માતામાં સમર્પણની કમી નહોતી, પરંતુ તેને પોતાની દીકરીની ખૂબ જ ચિંતા હતી. "તે મારી કારકિર્દીનું સંચાલન નહોતી કરી રહી, પણ પોતાની પુત્રીનું રક્ષણ કરી રહી હતી. આ બે સાવ અલગ નોકરીઓ છે," તેમ અવંતિએ સમજાવ્યું.

ઉભરતા કલાકારો માટે વ્યાવસાયિક માળખાનો અભાવ

આ અનુભવમાંથી પાઠ લઈને અવંતિએ પાછળથી પ્રોફેશનલ એજન્સીઓ સાથે કામ કરવાનું શરુ કર્યું, જેઓ અંગત સંબંધોને વ્યવસાયિક નિર્ણયો સાથે ભેળવતા નથી. તેણીએ નોંધ્યું કે દેશમાં નવોદિત અને ઉભરતા કલાકારો માટે પોતાના પ્રોફેશનલ ક્રૂ કે ટીમ શોધવા માટે કોઈ યોગ્ય માળખાગત સુવિધા જ નથી. આ જ કારણે મોટાભાગના સર્જકો શરૂઆતમાં માતાપિતા, મિત્રો કે ભાગીદારો પર નિર્ભર રહે છે. આ વાયરલ પોસ્ટે ઘણા લોકોનું ધ્યાન ખેંચ્યું છે અને લોકો અવંતિના વ્યવસાયિક નિર્ણય તેમજ તેની માતાની રક્ષણાત્મક વૃત્તિ બંનેને સમર્થન આપી રહ્યા છે.