મોતિહારી : બિહારના બાપુધામ મોતિહારી રેલ્વે સ્ટેશન પર શુક્રવારે સાંજે એક અત્યંત સનસનાટીભરી અને હૃદયધબકાવનારી ઘટના સામે આવી છે. સ્ટેશન પર મુસાફરોની અવરજવર વચ્ચે અચાનક એક ૧૪ વર્ષની કિશોરી પ્લેટફોર્મ તરફ પુરપાટ ઝડપે આવી રહેલી વંદે ભારત એક્સપ્રેસ ટ્રેનના એન્જિન સામે કૂદી પડી હતી. જોકે, ટ્રેનના લોકો પાયલટે અદ્ભુત સમયસૂચકતા અને ત્વરિત નિર્ણયશક્તિ દાખવીને ઈમરજન્સી બ્રેક લગાવી દેતા કિશોરીનો આબાદ બચાવ થયો હતો.

ટ્રેન નજીક આવતાં જ ટ્રેક પર લગાવી છલાંગ

મળતી માહિતી મુજબ, ટ્રેન નંબર ૨૬૫૦૧ વંદે ભારત એક્સપ્રેસ સાંજે લગભગ ૬:૧૫ વાગ્યે બાપુધામ મોતિહારી સ્ટેશનના પ્લેટફોર્મ નંબર બે પર પ્રવેશી રહી હતી. આ જ સમયે પ્લેટફોર્મ પર ઉભેલી ૧૪ વર્ષની એક કિશોરીએ અચાનક જ દોડીને ટ્રેક પર કૂદકો મારી દીધો હતો. એન્જિનની તદ્દન નજીક છોકરીને જોતાં જ લોકો પાયલટે સહેજ પણ વિલંબ કર્યા વગર ઇમરજન્સી બ્રેક ઝીંકી દીધી હતી. જોરદાર અવાજ સાથે ટ્રેન થોડા જ અંતરે અટકી જતાં પ્લેટફોર્મ પર હાજર મુસાફરોમાં ગભરાટ અને અફડાતફડી મચી ગઈ હતી.

મુસાફરો અને RPF જવાનોએ સુરક્ષિત બહાર કાઢી

ટ્રેન સંપૂર્ણપણે અટકી ગયા બાદ તુરંત જ ત્યાં તૈનાત રેલ્વે પ્રોટેક્શન ફોર્સ (RPF) ના કોન્સ્ટેબલ ગોવિંદ પ્રસાદ અને સ્થાનિક મુસાફરોએ નીચે ઊતરીને કિશોરીને હેમખેમ ટ્રેક પરથી પ્લેટફોર્મ પર લીધી હતી. આ ઘટનાને કારણે સ્ટેશન પરિસરમાં થોડીવાર માટે ભારે હોબાળો મચી ગયો હતો. સુરક્ષા પ્રક્રિયાઓ પૂર્ણ કર્યા બાદ વંદે ભારત એક્સપ્રેસને પોતાના ગંતવ્ય સ્થાન તરફ રવાના કરવામાં આવી હતી.

પરિવારજનોને સોંપવા કાનૂની કાર્યવાહી શરૂ

RPF પોસ્ટ કમાન્ડર ભરત પ્રસાદે જણાવ્યું હતું કે પૂછપરછ દરમિયાન કિશોરીની ઓળખ શહેરના રઘુનાથપુર વિસ્તારની નિવાસી તરીકે થઈ છે. બાળકીની સુરક્ષા અને ગોપનીયતા જાળવવા માટે તેની ઓળખ ગુપ્ત રાખવામાં આવી છે. RPF એ આગળની કાનૂની કાર્યવાહી અને કિશોરીને તેના પરિવારજનોને સહીસલામત સોંપવા માટે બાપુધામ મોતિહારી સરકારી રેલ્વે પોલીસ (GRP) સ્ટેશનના સબ-ઇન્સ્પેક્ટર પ્રગતિ રાઠોડને હવાલે કરી છે.