અંકરા: ગાઝા માટે જઈ રહેલા એક્ટિવિસ્ટ ફ્લોટિલા (જહાજોના કાફલા)ને રોકવાના મામલે તુર્કીયે દ્વારા ઈઝરાયેલના વડાપ્રધાન બેન્જામિન નેતન્યાહૂ સામે આંતરરાષ્ટ્રીય અરેસ્ટ વોરંટ જારી કરવાની પ્રક્રિયા શરૂ કરી દેવામાં આવી છે. તુર્કીયેના ન્યાય મંત્રી અકિન ગુરલેક દ્વારા જણાવવામાં આવ્યું છે કે તેમની સરકારે ઈન્ટરપોલના માધ્યમથી બેન્જામિન નેતન્યાહૂ અને અન્ય એક ઈઝરાયેલી અધિકારી સામે રેડ નોટિસ જાહેર કરવા માટે અધિકૃત અનુરોધ કર્યો છે.

તુર્કીયેનો આરોપ છે કે વર્ષ ૨૦૨૬ના મે મહિનામાં ગાઝાની નાકેબંધી તોડવાનો પ્રયાસ કરી રહેલા આંતરરાષ્ટ્રીય ફ્લોટિલાને ઈઝરાયેલ દ્વારા આંતરરાષ્ટ્રીય જળસીમામાં ગેરકાયદેસર રીતે રોકવામાં આવ્યો હતો. આ સંદર્ભે ઇસ્તંબુલની એક અદાલતમાં વડાપ્રધાન નેતન્યાહૂ સહિત અનેક ઈઝરાયેલી અધિકારીઓ સામે તેમની ગેરહાજરીમાં મુકદ્દમો ચલાવવામાં આવી રહ્યો છે. આ અધિકારીઓ પર નરસંહાર (Genocide), યાતના, માનવતા વિરુદ્ધના ગુના, ગેરકાયદેસર અટકાયત અને જહાજોના અપહરણ જેવા અત્યંત ગંભીર આરોપો મૂકવામાં આવ્યા છે.

બીજી તરફ, ઈઝરાયેલ દ્વારા આ તમામ આરોપોને સખત શબ્દોમાં ફગાવી દેવામાં આવ્યા છે. વડાપ્રધાન નેતન્યાહૂએ તુર્કીયેના રાષ્ટ્રપતિ રેચેપ તય્યપ એર્દોઆનની કડક આલોચના કરતા જણાવ્યું છે કે આ પગલું સંપૂર્ણપણે રાજકીય ઉદ્દેશ્યથી પ્રેરિત છે અને તેનો કોઈ કાનૂની આધાર નથી.

નોંધનીય છે કે ઈઝરાયેલ અને તુર્કીયે વચ્ચે લાંબા સમયથી ભારે તણાવ જોવા મળી રહ્યો છે. અગાઉ વર્ષ ૨૦૧૦માં ગાઝા જઈ રહેલા એક પ્રો-પેલિસ્ટિનિયન ફ્લોટિલા પર ઈઝરાયેલી કમાન્ડોની કાર્યવાહી દરમિયાન ૧૦ તુર્કીયેના નાગરિકોના મોત થયા હતા, જેના કારણે બંને દેશો વચ્ચેના સંબંધો વણસ્યા હતા. હાલના વર્ષોમાં પણ ગાઝા યુદ્ધ અને પેલેસ્ટાઈન મુદ્દે તુર્કીયે સતત ઈઝરાયેલની ટીકા કરતું રહ્યું છે, જ્યારે ઈઝરાયેલ આ આરોપોને આધારવિહીન ગણાવતું આવ્યું છે.